الأحد، ديسمبر 09، 2007 02:25
الهداري الفارغة:

جرات العادة، و ربي يقطع علينا هذي العادة... إنو في الفترة هذي من كل عام... نعدي الكاباس

الإستعدادات تبدى من ليلة الكاباس... التحضيرات تكون على قدم و ساق، نعمل عومة باهية (تبحبيحة)... نحدد السروال و السورية، وقفهم يوقفوا... نكلم الجماعة نستفسر على أحوالهم و نأكدوا على بعضنا بش نتقابلوا و نعملوا قعيدة باهية، تلقى ثمة قعدة ما قبل الكاباس... و قعدة ما بعد الكاباس، و كل قعدة و جوها و حديثها، كيف ما يقولوا: لكل مقام مقال

يا حسرة... نتذكر اول عام عديت فيه الكاباس... مازلت متخرج جديد، مش فاهم الدنيا كيف ما يلزمها تتغهم، ماشي في بالي إنو كيف كملت المسيرة الدراسية متاعي، جا الوقت إني نخمم في مستقبلي و في حياتي المهنية و العائلية و الإجتماعية و أي حاجة تهم العباد اللي نشوفوا فيهم عايشين معانا في الدنيا هذي

يزيد قلبي يوجعني مرة أخرى كيف نتذكر سلمى، و نتذكر المساج اللي بعثتهولي ليلة أول كاباس عديتها في حياتي:

3zizi nchallah betawfi9 et je suis sure que tu es capable

que tu vas reussir de tout mon 9albiiiii bonne chance

إيـــــــــــــــــــه، يا حسرة!

و يزيد قلبي يوجعني أكثر... كيف نتذكر كيفاش غمرتني الفرحة و السعادة وقتها... ننجم نقول إني وقتها عشت، و لو للحظات قليلة (تعتبر م القلال في حياتي) في ما يسميوه جماعة الشعر و الخواطر بأحلام اليقظة.

ويزيد قلبي يوجعني أكثر و أكثر... كيف نتذكر إنها بعثتلي مساج آخر العام اللي بعدو (ليلة الكاباس زادة)...

لو كان نلقى إني نضرب راسي ع الحيط، نفلق جد بوه... كيف نتذكر إنو في العام اللي بعدو ما بعثتليش مساج، عرست...

ما عليناش، ربي يهني... هو الواحد كيف يحب يلوم يعذر، يا أخي إلى متى...

تعدات أيام ترحي في السنين، ندوروا ندوروا و نرجعو فين كنا: الكاباس

عند الإمتحان، يكرم المرء أو يهان... و الواحد من كثرة ما تهان، ولاّ ما عادش يلوج، استانس، كيف ما يقول المثل الشعبي: عزوزة و ما همها قرص

صحيح الواحد تو يحمد ربي ع النعمة اللي هو فيها، وين كان و وين صبح... كنت السنين الأولى نعدي الكاباس على خاطر نلوج على خدمة، تو نلوج على حاجة مضمونة، نحب نولي مسمار في حيط كيف ما يقولوا بعض الناس (و في رواية أخرى، قالوا: كيف مسمار جحا)


نجبد هاك الوريقات اللي كتبتهم في البريود دو ريفيزيون (فترة التحضير) متاع أول مرة حضّرت فيها للكاباس... تبربيشات فيهم الحوصلة متاع معظم (مش الكل) المعلومات و القواعد و الحاجات اللي يلزمني نتذكرهم بش ننجم نعدي الكاباس، بش ما تلقانيش كعبة لا، كيف الأطرش في الزفة

لكن الأعوام اللي تعدّوا قبل الكل حاجة، و الكاباس متاع العام هذا حاجة أخرى...

أول حاجة، الكاباس ولات انفورماتيزي، التكنولوجيا و ما قالت الناس، مش مشكل إنو بفضل التكنولوجيا هذي، ولينا نتحولوا للمندوبية الجهوية مرتين بش ننجموا نتمموا الإجراءات متاع الترسيم، بعد ما كنا في مرة واحدة نرسموا و ناخذوا التوصيل و يبعثولنا الإستدعاء للدار (ما نعرفش شنوة الفايدة متاع الزوز ماسوات متنبرين اللي حطيناهم في المطلب كيف هي الحكاية هكّه)

ثاني حاجة: الكاباس السنا... حتى حد ماهو فاهم كيفاش بش تتعدى، يعني حاجة جديدة، تحس ثمة سيسبنس (إثارة و تشويق) في الحكاية... م النهار اللي طبعنا فيه الكونفوكاسيون (الإستدعاء) و كل يوم تسمع حاجة شكل، و معلومة اغرب م اللي قبلها:

- قاللك يا سيدي بن سيدي، بش نعدّوا الإمتحان الأول، كيف ما استانسنا قبل. و من بعد، يعيطوا للممتازين بش يعدّوا الإمتحان الثاني... والله حاجة باهية، بأنقص مصروف ع اللي بش يعدي، و ع الدولة، و الأهم من كل شي، بأنقص مشي و جيْ

- تي لا، السنا قالوا بش نعدّوا كيف الأوروباوين و الأمريكان: جواب صحيح، زيد بونتو. جواب غالط، نقّص بونتو. ما تعرفش، ما تجاويش خير... عاد شبيه، علاش لا، خليهم يجربوا، لعل حاجة باهية (و أحنا ما نعرفوش)، اما اللي جاوب الأكثرية بالغالط و يطلع مسال، ش يعمل (يدفع خطية و إلا يتحسبولوا ع العام اللي من بعدو).

- لا لا لا، هاو يقولوا السنا لا هرج و لا صداع. بش نعدّوا بالــ كي سي ام (أسئلة متعددة الاختيارات)... خير م الكل، لا صداع و لا وجيعة راس

- يحكوا انو السنا بش يعطونا ورقه، كيف وراقي البروموسبور. تعمرها و ترجعها، و قاللك زادة انو بش يصلحوهم ع الماكينات متاع البروموسبور... هذي معقولة، و النتيجة يكملوا يهبطوها في الأحد الرياضي مباشرة (عدد الأعمدة الفائزة... لمزيد م الشفافية)

- و كان مكش مصدقني، الحكاية هذي مهبطينها في الرائد الرسمي، تنجم تثبت... ش بيني عقاب عمري بش نولي نشري في الرايد الرسمي زاده

تي علاه هكه تو بربّي؟

تي كيف هي هكه الحكاية، و نحكوا و نصلوا ع النبي كيفاش انو التكنولوجيا الرقمية و لات حاجة عادية عندنا... ما فيها باس و كان يعملونا عقاب وريقة في هاك الدوبلفي دوبلفي دوبلفي نقطة كاباس نقطة ايدونات نقطة تي ان اللي سجلنا فيه، و جبدنا الإستدعاء منو... يفهّمونا فيها الحكاية، يعني مش لازم بش نكونوا موجودين على عين المكان قبل بساعة م الإمتحان و نستناو في المفاجأة اللي بش يطبقوها علينا عام السنا





هيا نخليكم في الامان، خليني نمشي نرقد، ثماش ما غدوه تلقى عندي شوية فورمة للامتحان... لعل تخطف المرة هذي؟ شكون يعرف؟
(يتبع...)

قريتها:
مشاركة هذه التدوينة:
E-Mail Facebook Twitter Blog Buzz
تعليق Néo ...  

Je sais que ça ne change rien de dire "bonne chance" mais je te le dis quand meme :)


الأحد, ديسمبر 09, 2007 3:11:00 ص

تعليق البرباش ...  

:-)
ميرسي عليك... ع الأقل يرفع م المعنويات شوية


الأحد, ديسمبر 09, 2007 3:14:00 ص

تعليق Slaim ...  

inti inces behi wmouch il kabes illi 3amlinou kamcha hommal fichlou fi tach3'il wled libled houwa il bach yroddek 3abd a7cen, sidi inchallah rabbi ya3tik 3ala 9add 9albek wken jat iddinia dinia rahou ichabab howa illi machi fil bled ama ich3ouret loubyodh wil msamer limsaddida ma5allaw blasa il 7add...

3ala koll 7al allahou al mousta3an


الأحد, ديسمبر 09, 2007 5:19:00 ص

تعليق 3amrouch ...  

بره خويا انشاألله مربوحة.....
وكيما قال سليم عمرها ماالكاباس باش تولي معيار


الأحد, ديسمبر 09, 2007 8:33:00 ص

تعليق Wanted ...  

nchallah marbou7a (kima reb7et l'etoile lyoum !)
na3erfek tmout 3al mkac.. no9sed l'étoile :)


الأحد, ديسمبر 09, 2007 11:06:00 ص

تعليق غير معرف ...
 

ne perd pas ton temps pour y passer parce que cette anné j'ai entandu parler que pour le passer il faut donner 4000dt l'autre anné ça ete 3000dt


الأحد, ديسمبر 09, 2007 12:51:00 م

تعليق a girl from Mars ...  

Bonne chance,rabbi m3ak..j'espère que tu réussira ton capes comme tu as réussi ton entrée dans la blogosphère:)
Tiens nous au courant et nchallah manasm3ou ken elkhir


الأحد, ديسمبر 09, 2007 1:17:00 م

تعليق غير معرف ...
 

hedhi a7sen 7kéya fergha 9rit'ha héhé
bonne chance ;)


الثلاثاء, يونيو 16, 2009 4:30:00 م

تعليق غير معرف ...
 

ربي معاك و معانا انا اول مرة انعدي و مشني فاهما شئ من كل شئ
haaaaaaaaaaaaaaaha


الخميس, أكتوبر 01, 2009 10:13:00 م