|
الثلاثاء، سبتمبر 23، 2008
09:30
|
|||||
 |
|||||
|
كنت عدّيت الكاباس في الدورة الاخرانية متاع جويلية... كنت تحدثت ع الأجواء متاع الكاباس اللي تزامنت مع احتفالاتنا بزواج الڤوفرنور في تدوينة [كاباس العادة... و العوايد] نهار السبت اللي فات هبطت النتيجة، و للمرة درى قدّاش (ضيعت الحساب، لكن هو نفس عدد المرات اللي عديت فيهم) نلقى روحي ما نجحتش
بصرف النظر ع الإمتحان و التحضير ليه و مهما كانت بش تكون النتيجة... كنت اتخذت قراري وقتها أني ما عادش بش نعدّيها الكاباس، و الدورة هذيكة كانت آخر مرة نعدّي فيها الكاباس... ولّيت عامل كيف هاك التلميذ متاع الإبتدائي اللي من كثرة ما دوبل، ماعادش يحب يمشي للمكتب، ولّى يحشم على خاطرو أطول واحد في القسم و اللي يقراو معاه الكل مفرخ... ربّي يسهّل للجماعة اللي نجحوا... و اللي من ضمنهم حنين، الطفلة اللي عطيتها القنفيدة (الشكارة اللي فيها الحلوى الدراجي) متاع كتبان الصداق متاع الڤوفرنور... لو كان في بالي راني استحفظت بيها. الكاباس، اللي كانت الموضوع اللي بديت بيه المغامرة متاع التدوين هذي... أصبحت الآن مجرد ذكرى
اللي بعدو يكبّر سعدو
|
|||||
|
|
قريتها: | ||||
|
مشاركة هذه التدوينة:
|
|||||
الاشتراك في:
تعليقات الرسالة (Atom)
إيييييييه إيييه كلّ نفس ذائقة الموت كرمك اللّه
تي يزّينا مالحديث عالكاباس ماني قتلك هوما إلّي ما نجحوش موش أنت
أفضل الجياد ليس من لا يَكبُو -فلكلّ جوادٍ كبْوَة- بل من يُحْسنُ النّهوض من كبْوَته
برّه أعمل صحافة و إلاّ حلّ مشروع آهوْك الصّنادق بزايد عارك على حقّك
يظهرلي باش نوليو نحسبوك من جماعة المسقطون عمدا من الكاباس يا برباش ...ما تسلنش في حقك في النجاح وربي معاك
haya el barka fik
Kol wé7éd w ech mkatablou rabi
Inchallah tal9a ma 5ir
tozz fiha el capes, chouf kifech tekseb 5obztek w rabbi m3ak.
Aya el barka fik, ama bi saraha kima qala illi quabli tozz fiha. Jétni el ghamma fi qualbik téfakkart el compus el ménha kifech 3addit 2emme année droit 3 fois ou 4 je me rappelle plus ( système léqudim) wi men ba3d taritli wi mechit baddalt systeme completement, wi 3awidt quérit haja okhra bon khérafa tewila mais el barka fik.
ca viendra un jour!!:)
و الله وجعتني يا برباش !!! لأني نعرف ماية في الماية إنك تستحق ها الكاباس ! إذا كان الأمتحان هذا إدور في ظروف شفافة !!! ألي يقهر يا سي البرباش ..بالي الأمتحان هذا قاعد يتباع و يتشرى على حساب النجباء و على حساب التوانسة جميعــــــــا ! وقت ألي التونسي الصافي ، الصّادق، ما عاش يخلط ...باش إعيش : إنتهى أمر البلاد هذيكه ...
و لا يهمك برباش، ما تعملش منها أزمة وجودية، المهم في طاقتك للتأقلم لأي مهمة و الا خدمة و الا صنعة اتنجم تقوم بيها و يكون قلبك راضي و فرحان بيها. الدنيا مصاتت و اتخلط الحابل بالنابل و الكنتة ببعر الجحوشة، تبارك الله بين صويبعاتك مبات ماعون و ماعون يغزلو الحرير.
أية بعد رمضان نظملنا برنامج شوف الكوباندة و الزين خللي نبدلو الساعة بساعات أخرين و نعملو ألف راي.
la3ala fiha khir ya weldi! ema ena yodh'horli ken vraiment 3inek betta3lim 3awed 3addi
البركة فيك...أسالك على موعد دفن الكاباس الى الابد...
لا تنسى استدعاء كل زملاءك...وكذلك زملاءك في التدوين لحضور الجنازة.
لا تحزن يا ولدي...
والله ما قلتلي خير ، من وقت ما كتبت علي الإمتحان وانا نستني في النتيجة متاعك
ماتسلّمش و في نفس الوقت ماتخلّيش حياتك مربوطة بيها..
الله غالب
Ezza7, wallahi c eux/nous ki ont perdu un instituteur talenteux dans nos lycess
...
يطلعش زادة وجهي مشوم عليك يا برباش يا خويا ؟
:)
الاكيد يا برباش ان العباد الكل هوني يعرفوا قيمتك و شوية من قدراتك الهايلة
يعني الكاباس و الا اللا كاباس مش بش يغيروا من قيمتك ... و ماهي الا لعبة "حمرة كحلة" من لعب بلاد اللعوب و التلاعب الدائم ... و ما يدوم حال
علاش ما تعملش مرحلة ثالثة في اجامعة و تولّي إنت إلّي تعدّيلهم الكاباس الكابوس
إ لّي مبعدو يزيّن سعدو يا برباش...أنا متأكّد إلّي باش تسلّّكها بالكاباس و إلّا من غير كاباس
@ ولاّدة: الله يخليك... تو نخمم في اللي قلتو، بعد رمضان
@ أبو ناظم: لا يا خويا، خليني دوبلت كيف ما العباد الكل... ـ المشكلة اللي بش تعملهالي
@ جلنار: يبارك فيك
@ أفر**: غن شاء الله، لعل فيها خيرة
@ الغير معرف: شكرا ليك، ربي مع الجميع إن شاء الله
@ تاكس: نفهم فيك و راس خويا العزيز، البركة فيك انتي زاده
@ كاكتوسا: شكون يعرف
@ قاسم: و الله نعرف يا قاسم يا خويا، و العباد الكل تعرف... و هذيكة المشكلة
@ أزواو سومنديل أوراغ: أيواه، ب ا مرحبا يا مرحبا (تعرف اللي هذي اول مرة تكتبلي كومنتار)
نورمال، يصير ع الرجال (كيف ما قلت عمناول في نفس الغطار متاع نتيجة الكاباس) تو نحكوا من بعد و نعملوا الف راي إن شاء الله، و للحديث بقية
@ حـي: عينتي بالتعليم، اما يظهرلي مش بش نعاود نعدّي
@ طـه: هاو بش نعملوا ملمّة بالمناسبة
@ هناني: يعطيك الصحة، و نشكرك ع الشعور متاعك، حياتي من مدة ماهيش مربوطة بيها... إن شاء الله لاباس
@ بشبوش: ما خسروش برشا... ربي يقدّر اللي فيه الخير
@ القوفرنور: لا لا خاطيك راهو خويا العزيز... يعطيك الف صحة، و ما يدوم حال
@ علاء الدين: ربي يسهّل
@ الدوعاجي: الله يخليك، إن شاء الله مربوحة
ya barbeche! 3assa takrhou chay2an....
el wa9t tweel ! et le temps te donnera raison !
ya 5ouya burjouliya shey ibakki!!!inna lillah wa inna ilayhi raji3oune!nshallah rabbi isahhallak fi ma5Ir !nshallah tislek bil capes wella min guir capes
إرسال تعليق