الخميس، يونيو 05، 2008 22:00
الهداري الفارغة:


ندخل للمندوبية، اللي ولات تتسمى الإدارة الجهوية للتربية و التكوين (ما عادتش للتعليم)، نمشي للسيد اللي قاعد في الاستقبال

البرباش: خويا، صباح الخير... السنا وين يقيدو للكاباس بالله

عون الاستقبال: (في نفس الوقت اللي يمدلي فيه ورقة صغيرة مكتوب عليها نورمرو 26) هيا اتفضل تو نعيطولك

البرباش: بالله سامحني، ماو مايسالش نقيد لزوز م الناس فرد مرة... و إلا يلزمني نزيد ناخو زوز نوامر زاده؟

عون الاستقبال: مايسالش... كيف تحصل تدخل للداخل، اجبد الدوسيهات اللي عندك الكل و قيدلهم، ما ثمة حتى مشكل

عون الاستقبال: ماهو الأوراق الكل مريڤلة، التنابر لاصقة و النسخ الكل مطابقة و ... (ما يكملش)

البرباش: أي أي... ياخي اول مرة انقيدو

عون الاستقبال: (ابتسامة) هيا باهي، اتفضل امالا شد بلاصتك

نمشي وين الكراسي متاع الانتظار، نقعد، نجبد هاك التمبري بو عشرة آلاف، نلصقو في بلاصتو و نقعد نستنى

شريت التمبري تو عندي ثلاثة أيام (مع تمنيات السيد اللي في الكاسة متاع القباضة بالتوفيق و النجاح) و قعد محطوط في الجيب متاع السورية... ما لصقتوش ع الورقة لأني الحق متاع ربي قعدت متردد إذا كنت نكمل الإجراءات متاع التسجيل و إلا لا... إلا أني مؤخرا ربطت الخيوط في بعضها و لقيت روحي مضطر اني نهبط للولاية، و قلت ما فيها باس نكمل الإجراءات و انقيد في الكاباس فرد مرة، شكون يعرف لعل تخطف المرة هذي

ثمة ملاحظة باهية، انو المرة هذي و على غير ما صار المرة اللي فاتت، بش ناخذو التوصيل على عين المكان... يعني نقصولنا من عدد المرات اللي كنا مضطرين بش نهبطوا فيهم للمندوبية لإتمام إجراءات التسجيل، و إن شاء الله في قادم المرات يلقاولنا حلول بش ما عادش نهبطوا جملة واحدة لغادي، و وقتها تولي الحكاية بالحق أنفورماتيزي على قاعدة

ثمة زوز م الناس طلبوا مني اني نهزلهم الاوراق متاعهم فرد مرة، و بما انو ما ثمة حتى مشكل، وافقت

عون الاستقبال: (يعيّط) 26 .. 27 .. 28 .. 29 .. 30 هيا تفضلوا

عون الاستقبال: (يعاود) م الـ 26 للـ 30 تنجموا تتفضلوا يعيشكم

نقوم، نمشيلو، يدلني على بيرو ندخللو نلقاها نفس السيدة اللي قيدتلي المرة اللي فاتت (اللي حكيت عليها في تدوينة [الكاباس... تفرهيدة و إلا مستقبل]) مع نفس الابتسامة

البرباش: عسلامة... ماو مايسالش نقيّد لزوز م الناس معايا فرد مرة

السيدة اللي في مكتب الاستقبال: صباح الخير، أي مايسالش... ما ثمة حتى مشكل

نجبد هاك الأوراق، و نبدى نمدلها بالدوسي بالدوسي

السيدة اللي في مكتب الاستقبال: ش يعمل السيد هذا؟

البرباش: حتى شي...

السيدة اللي في مكتب الاستقبال: شنوة، من عام 2002 لتو ما هو يعمل في حتى شي

البرباش: لا، قاعد يعدّي في الكاباس... و كل عام يستنى بش ينجح و في الآخر ما ينجحش

السيدة اللي في مكتب الاستقبال: كيفاش؟

البرباش: بطّــال، تي اعرف على ماهو حالتو مكربة طمع فيّ بش نهز نقيّدلو

السيدة اللي في مكتب الاستقبال: تي لا عاد، هذا يلزموا يفيق عند روحو

البرباش: و الله عيينا و أحنا نفهموا فيه، ما حبش يفهم... كل واحد يعرف ما يصلح بيه

السيدة اللي في مكتب الاستقبال: (بعد ما نمدلها الدوسي الثاني) و هذي زاده كيفو؟

البرباش: لا لا... هذي ساعة ساعة يعيطولها تعمل نيابة في مكتب م المكاتب في البلاد

السيدة اللي في مكتب الاستقبال: أي، باهي، أبرك... ع الأقل

السيدة اللي في مكتب الاستقبال: (بعد ما نمدلها الدوسي الثالث، الخاص بيّ... و بنبرة كلها تحسّر) لا لا، الدوسي هذا ما انجمش نقبلوا

البرباش: (مفجوع) علاه! جات عندي انا و حبست... ما عنديش الحق انعدّي؟

السيدة اللي في مكتب الاستقبال: لا لا، اما النسخة متاع الأستاذية يلزمها كونفورم

البرباش: من وقتاش! ماهمش حاطين في الانترنت... و زيد هاني الورقة قدامك ماهمش كاتبين علاها

السيدة اللي في مكتب الاستقبال: (بإيماءة من رأسها) نعرف نعرف... أما وصاونا السنا قالوا ما تقبلوا المطالب كان ما تكون نسخة مطابقة للأصل

البرباش: (بنبرة كلها حزن) هيا باهي، تي ع الأقل كيف وصاوكم، ماهو يوصّيونا احنا زاده فرد مرة و يقولولنا بش نعرفوا أرواحنا علاش قادمين

السيدة اللي في مكتب الاستقبال: (متفاعلة معايا، بنبرة كلها حزن زاده) الله غالب، تلقاهم نساو

البرباش: (بنبرة كلها تحسّر) ربي يهديهم... باهي ش عملنا تو و جاء مليح

السيدة اللي في مكتب الاستقبال: ياخي هي موش فوقك الميتريز

البرباش: علاه، ياخي هي بطاقة تعريف... و زيد مش أول مرة نعدّي، ياخي بش نغشّوكم بالله

السيدة اللي في مكتب الاستقبال: (ابتسامة) مش حكاية تغشونا، اما هذاكه ش وصاونا... الله غالب

السيدة اللي في مكتب الاستقبال: (تواصل كلامها) باهي تعرفشي كيفاش، هاو بش نقبلوا عليك الدوسي... لكن يلزمك تجيبلي النسخة المطابقة للأصل في أقرب فرصة

البرباش: (أخيرا) أي أي... اكيد تو نجيبها

البرباش: (نسكت شوية، ندور الحكاية في مخي) و كيف ما نجيبهاش، ش يصير زعمة؟

السيدة اللي في مكتب الاستقبال: (نفس الابتسامة متاعها) لا عاد، وقتها ينجموا يروفزولك الدوسي جملة واحدة راهو

البرباش: (في نفس الوقت اللي قاعدة فيه تصحح ع الورقة متاع التوصيل) لا لا، إن شاء الله لاباس

السيدة اللي في مكتب الاستقبال: (تمدلي الورقة متاع التوصيل بعد ما تطبع علاها) إن شاء الله... ربي ينجّح سي البرباش

البرباش: يعيشك... ربي يعينك، هيا في الامان

يعني حتى المرة اللي نقصوهالنا في عدد الهبطات للمندوبية، هاو بش ترصّيلي نعاود نهبطها...

و انا خارج، يعرضني العون متاع الاستقبال... مع ابتسامة عريضة يتمنالي النجاح و التوفيق في الكاباس... موش عارف علاه العباد الكل فرحانين بينا المرة هذي، و هكه هكه وين انحطك يا طبق الورد... هوما الحق متاع ربي حتى عمناول فرحوا بينا على غير ما جرات بيه العادة، أما كثرولها شوية، يمكن كثروا على ما وصّاوهم زاده...

قريتها:
مشاركة هذه التدوينة:
E-Mail Facebook Twitter Blog Buzz
تعليق غير معرف ...
 

ya sidi nchallah badw bétmaam... jaték fi habta zayda, RABBI ikoun fél 3oun!!w nchaallah bénjé7 w twallilna ostadh w tfarra7 él as7aab wél a7béb!!! w tsahém fi énchaa chabéb él mousta9bél fi Tounés él ghad ;D


الخميس, يونيو 05, 2008 11:06:00 م

تعليق أرابيـكا ...  

صباح الخير برباش
وان شاء الله بالتوفيق


الجمعة, يونيو 06, 2008 7:51:00 ص

تعليق DJ WAEL ...  

التونسي و الإمتحانات ... حكاية ما توفاش ...

ربي ينجح سي البرباش و إن شاء الله توكلنا بريج بقلاوة


الجمعة, يونيو 06, 2008 9:18:00 ص

تعليق ->> AntikoR <<- ...  

حظ سعيد


الجمعة, يونيو 06, 2008 9:48:00 ص

تعليق Bel Malwene ...  

هـيـّا ربي ينجح يا برباش !!! ما تنساش باش تــهز فيدك طويبعات سكر نهار الإمتحان ... (و وريقة بالقاسم بو 30 ... ممكن ياسر تحتاجلها هية زادا) ههههههههه


الجمعة, يونيو 06, 2008 10:30:00 ص

تعليق غير معرف ...
 

خبر عاجل: تعيش الرديف منذ يوم أمس أحداثا مأساوية اثر استفزازات قمت بها قوات الأمن لمتساكني الرديف و اندلعت مواجهات مفتوحة مع الأهالي فجرا وحسب الأخبار الواردة من هناك فأن المواجهات التي عرفتها البلدة كانت صباح اليوم اثر حملة الاعتقالات التي تمت ليلة البارحة و قد أفاق المواطنون صباحا على مشهد الدكاكين التي وقع اقتحامها و العبث بمحتواياتها و اتهم الأهالي قوات الأمن بالقيام بهذه الأعمال اذ رغم حفاظ الأهالي على الممتلكات العامة وعيا منهم بأنها ملك للجميع فأن بعض وحدات الأمن نظمت عمليات النهب لممتلكاتهم حسب رواياتهم و تواصل تدفق التعزيزات الأمنية بآليات جديدة لم يتعود المواطنون مشاهدتها حتى على شاشات التلفزة و قد هدّد اليوم تلاميذ الباكالوريا بمقاطعة الامتحانات الوطنية في صورة تواصل عمليات القمع و تقوم قوات الأمن حاليا بحملة تمشيط واسعة في الأحياء مما دفع أغلبية الشباب للهروب الى أطراف البلدة و لعل ما زاد في احتقان الأهالي بعد شيوع خبر تعرّي بعض رجال الأمن أمام النساء أثناء اقتحام البيوت السؤال المطروح لماذا تعمدت قوات الأمن تفجير الوضع بالرديف؟
هناك اشاعات تقول أن القوى الأمنية استنزفت و تريد الضغط على بعض رجال السياسة لحسم الوضع بالحوض المنجمي سواء بالحسم الأمني أو الحلول السياسية لكن هل يدفع سكان الرديف ضريبة التجاذب بين جنرالات الداخلية و جنرالات السلطة
romdhane


الجمعة, يونيو 06, 2008 1:28:00 م

تعليق البرباش ...  

مشكورين على مروركم و تعليقاتكم

@ غير معرف الأول: يعيشك، بارك الله فيك

@ آرابيكا: إن شاء الله نهارك زين، شكرا

@ وائل: إن شاء الله يا خويا إن شاء الله

@ أنتيكور: شكرا

@ بالملوان: لو كان ع الفجعة و الرهبة م الإمتحان، اتهني، خوك ماهيش أول مرة نعديها الكاباس، استانست... و ورقة بلقاسم بو 30، ما نحتاجوهاش، الإمتحان يتم في كنف الشفافية المطلقة (ما أكثرش من هكه) و اللي يعسّوا علينا مساكن تلقاهم فادين اكثر م اللي يعدّيو، و خاطيتهم الهدرة.

@ غير معرّف الثاني: اللي اسمو سي رمضان... كان عرضك هكه قاسم جيبوا معاك و ايجي المرة الجاية


الجمعة, يونيو 06, 2008 6:12:00 م

تعليق Mehdikaf(mimekaf ...
 

أوّلا: ربي ينجح و يجيب في الصواب..
ثانيا: يابرباش راهو ثمة واحد يشبهلك ياسر العام لول شيخهم بالباكو ..وعل كل حال نعتذر في بلاصتهم لمجـرّد الشبهة...و هذاكه علاش فرحوا بيك وانشالله ما يفيقوش ...والطمّــاع يبات ساري.....


الجمعة, يونيو 06, 2008 9:49:00 م

تعليق shadow ...  

Ya narék kan ma thézéch élwar9a éli na9ssa hawna 9otlék!loool twali ma tloum kan nafssék mdr!
ou kima i9oul wa7éd 3ala ma3az 9olou inchallah marbou7a élmarra hadhi ya si barbach !


الجمعة, يونيو 06, 2008 9:51:00 م

تعليق البرباش ...  

@ مهدي كاف: يعيش خويا العزيز... أما الباكو و الشيخة موش مع جماعة المندوبية راهو، هذوكة مساكن خاطيتهم الهدرة، فرحوا بينا لأنهم وصّاوهم بش يفرحوا بالعباد الكل، هكاكة الإدارة متاعنا يلزمها تكون

@ شادوو: هزيتها الورقة سايي... إن شاء الله مربوحة عند الكل


الأحد, يونيو 08, 2008 10:35:00 ص

تعليق fridka ...  

salut berbache, je t'assure qd j'ai vu l'annonce pr le capes à la télé, j'ai pensé à toi ss savoir pkoi... si je sais ta note sur le capes de la dernière fosi m'avais marqué, j'espère que celle ci serait la dernière et tu seras bientot un de nos valeureux prof..rabbi yenejeh..
mes amitiès


الثلاثاء, يونيو 10, 2008 11:59:00 ص

تعليق Sonya ...  

الحقيقة اني متفائلة المرّة هذه
انت راجع مليح و ركّز في الامتحان
و انشاء الّه فمّا كان الخير


الثلاثاء, يونيو 10, 2008 11:32:00 م

تعليق البرباش ...  

@ فريدكه: شكرا شكرا شكرا... ما تتصورش قداش أسعدني التعليق متاعك كيف قريتو... ربي يسهل و إن شاء الله الأخيرة كيف ما قلت انتي... انا الأسعد بصداقتك

@ سنية: انتي متفائلة، على خاطرك ما عديتش المرة اللي فاتت سا سنية... على كل، ركز انتي زادة مليح و إن شاء الله ما ثمة كان الخير


الثلاثاء, يوليو 15, 2008 11:48:00 ص