الجمعة، مايو 09، 2008 00:30
الهداري الفارغة:

أولا... نحب نتأسف ع الانقطاع متاعي ع التدوين في الفترة الأخيرة، رغم اللي عندي برشا حكايات بش نحكيهم و برشا مواقف صاروا عليّ في المدة الاخيرة هذي ما انجمش نفلتهم م غير ما نكتب حويجة ع الأقل... لكن، الله غالب الظروف و إن شاء الله عن قريب نرجع للتدوين و لحكاياتي

ثانيا، نحب نشكر اللص نومرو واحد و اكسكيزا اللي تفكروني في لعبة الصورة الصينية م العناصر المحلية اللي بداها أزواو سومنديل اوراغ... و فكروني اللي أنا عندي مدونة ملزوم ساعة ساعة نكتب فيها كليمة، و نزولا عند رغبتهم هاو بش نقول ش عندي

لو كنت شجرة: ما نحلم نكون كان نخلة

وقت اللي كنت نقرى في الابتدائي، كانت عندنا نخلة طويلة برشا في المكتب متاعنا... و كنت كيف نغزرلها، ينبتني الرعب و نخاف...استانسنا و احنا صغار يقولولنا انو اللي يعمل عملة موش باهية، ربي يعلقو من شوافر عينيه... كيف ما استانسنا أحنا (صغار المكتب) بالمديرة متاع المكتب متاعنا (و اللي ما يعرفش المديرة، ما عليه كان يقرى تدوينة [ذكريات... أيام زمان]) كل تريميستة ملزوم ما تدور علينا بالقسم بالقسم و تهددنا أنو اللي ما يجيش يقرى الأوتيد (الدروس الخصوصية، اللي كانت وقتها تتم بسعر يعتبر رمزي)، فإنها بش تعلقو من شوافر عينيه في النخلة

لو كنت أكلة: الملاوي

رغم انهم الحوانت اللي يطيبوا الملاوي، أبعد ما يكون ع النظافة، إلا أني ما انجمش نشد روحي كيف نتعدى مع جنب حانوت متاع ملاوي م غير ما نشري

عندي غرام كبير بالبطاطا، و الجبن زادة... يمكن الجبن انجم نستغنى عنو لكن ما انجمش ناكل أي حاجة كيف ما تكونش ثمة بطاطا موجودة

في المغلب، ما عنديش أكلة معينة مغروم بيها... لكن المهم الحاجة اللي بش ناكلها، تكون فيها البطاطا

لو كنت زهرة: ما نكون كان زنبقة

ما نعرفش علاش، ما يعجبني م النوار كان الزنبق، و خاصة الأصفر... اول مرة نسكن خارج المبيت وقت اللي كنت طالب، كان استوديو من عند مرى عزوزة سبنيورية، و كانت مغرومة بزراعة الورود و عاملة في الحديقة متاع الفيلا متاعها بيت الكلها بلار فيها عديد الأنواع م الأزهار، و كنت كل وين نمشي نخلّصها في المعلوم متاع الكراء راس الشهر، تهاديني بباقة من أزهار الزنبق... و قعد عندي نوع م الغرام بالنوع هذاكه م النوار ش خلاني المرة الوحيدة في حياتي اللي شريت فيها نوّار بالفلوس، من عند البياعة متاع شارع الحبيب بورقيبة، كانت باقة من زهور الزنبق الأبيض و الأصفر، و رغم انو وقتها كانت ثمة اعتراضات ع الاختيار، و عارفو بش يتكلفلي شحم يهود، لكني شديت صحيح و أصرّ يصرّ إلحاحا... يا حسرة

لو كنت قرية أو دشرة او حارة: حومتي

يقوللك النبي وصّى على سابع جار... أنا عندي أول جار، اللي مقابلني، يمكن نسلّم في الدنيا و ما فيها و ما نسلمش في الجيرة متاعو... حب متبادل اللي يقولوا عليه م القلب للقلب

أي، حاجة أخرى... حومتي، مثال حي على أنو الدوام ينقب الرخام، و ما يغلب الحاكم كان الخليقة و الباربو و اللي يعرف كيفاش يتفاهم مع المسؤولين... و اللي يحب يطبق القانون، يطبقوه

عندي برشا حكايات على حومتي إن شاء الله نلقى الوقت و نكتبهم

لو كنت قصيدة: يمكن نكون قصيدة للشافعي يقول في مطلعها نعيب زماننا...

الحق متاع ربي مانيش مغروم بالشعر... حكاية قديمة كانت صارتلي وقت اللي كنت نقرى في السيزيام، خلاتني نكره الشعر و نفد منو... لكن ما نعرفش علاش الأبيات متاع الشافعي اللي يقول فيهم

نعيب زماننا و العيب فينا ... و ما لزماننا عيب سوانا

و نهجو ذا الزمان بغير ذنب ... و لو نطق الزمان لنا هجانا

و ليس الذئب يأكل لحم ذئب ... و يأكل بعضنا بعضا عيانا

هوما الحاجة الوحيدة اللي قعدت نحفظها (إلى جانب النشيد الوطني، القديم و الجديد بالطبيعة) م الشعر و ما نجمتش ننساهم... و ما نتصورش لو كان ننساهم

لو كنت شخصية تاريخية: ويليام والاس

رغم أنو يقعد مرتبط في خيالي بميل جيبسون اللي جسد الشخصية و كان ليه دور البطولة في فيلم بريف هارت، إلا أنها الشخصية هذي م القلال اللي جلبت انتباهي و نلقى روحي نبحث في التاريخ متاعها، و كيفاش قعدت اسطورة يفتخر بيها الشعب الاسكتلندي إلى يومنا هذا

صحيح أنو مات موتة مشنعة، لكنو ع الأقل مات راجل و ثمةعباد لتو تحلف براسو

لو كنت شخصية خرافية: لينك

البطل في لعبة أسطورة زلدا... اللعبة الشهيرة متاع نينتاندو

لو كنت وادي أو نهر: مجردة

مجردة... المكسب متاعنا

لو كنت شخصية قصصية: سعيد مهران

البطل في قصة اللص و الكلاب متاع نجيب محفوظ

ع الأقل العبد يكون لص، خير م اللي يكون كلب م الكلاب

لو كنت حيوان: بالطبيعة نمالة

نملة م النمل في وسط الصحراء، مش اللي يعيشوا في الديار و ياكلوا التفاتف و ما يعرفوش على أرواحهم اناهو نهار يعفسوهم بقدم الصباط

العالم و النظام متاع قبائل النمل (و النحل زاده) قعد م الحاجات اللي نحاول ديمه نعرف اكثر ما يمكن م المعلومات عليها... و موش من عدم انو اختياري للوڤو متاع البلوغ متاعي كان صورة نملة، و لو انها حكاية اللوڤو تقعد قصة أخرى

لو كنت حليّ: مڤياس

المڤياس، اللي تغني عليه امينة فاخت

لو كنت لباس: قشابية

قشابية متاع بكري، مدقوقة عند النساج... موش اللي يجي ينجم يحطها فوق ظهرو و يلبسها و يدور بيها


لو كنت رائحة: ريحة البخور

خاصة البخور الأحمر اللي يجيبوه الحجاج معاهم م الحج

لو كنت موقعا: برج بيتزا

العوج ما نحملوش...

باهي، تو يلزمني نختار ستة م الناس بين مدونين و مدونات بش انعدّيلهم المشعل...

مريومة

سنية

شادوو

وانتد

وليد

كيبيتز

قريتها:
مشاركة هذه التدوينة:
E-Mail Facebook Twitter Blog Buzz
تعليق shadow ...  

Mala ya3ték zanba9a fi 5achmék ou mlawi fi fomok ou namala fi mo5ék ou ...hawnék e5tar chét7éb a5or ta nétmanahoulék mdr!


الجمعة, مايو 09, 2008 12:52:00 ص

تعليق Bej ...  

بقدر ما انحس إلّي إنت إنسان مدارن، بقدر ما انحس إلّي إنت إنسان متشبّث بالعادات و تقاليد !! برافو شار برباش


الجمعة, مايو 09, 2008 12:18:00 م

تعليق DJ WAEL ...  

أهلا برباش
أنس المازوشي أما بالمدونة الجديدة (فديت منها لخرى و عملتلي مشاكل)

أما حكاية الملاوي عجبتني لوول


الجمعة, مايو 09, 2008 8:05:00 م

تعليق titof ...  

في بالك يا خويا البرباش الي زنبقةشعار الحركة الكشفية ومن المعروف انو الزنبقة تصمد في وجه التغيرات المناخيةمهما كانت قساوتها
دمت زنبقة في عالم التدوين


السبت, مايو 10, 2008 2:18:00 م

تعليق البرباش ...  

مشكورين على مروركم و تعليقاتكم

@ شادوو: يعطيك كل خير... اللي يجي منك مبروك

@ باج: تعيــــــــش

@ وائل (المازوشي سابقا): أهلا بيك كيف ما تكون... المفيد كيف اتطل

@ تيتوف: معلومة جديدة (و إلا يمكن راهي قديمة و أنا ما في باليش بيها) في عهدي بالكشافة كان شعارهم يد فيها زوز صوابع (الخنصر و الابهام) مثنيين فوق بعضهم... على كل، يرحم بوك و مرحبا بيك


الأحد, مايو 11, 2008 5:23:00 م

تعليق titof ...  

هذاك موش شعار هذيكة التحية الكشفية وتتضمن خصال الكشاف
التضحية
الصراحة
الاخلاص
القوي يحمي الضعيف والصغير يحترم الكبير
والتحية 3انواع
تحية العلم التحية الكبرى اليد على مستوى الجبين
تحية بين الكشفين تحية صغرى على مستوى الكتف
تحية عظمى في المواكب اليد مطلوقة


الاثنين, مايو 12, 2008 3:57:00 م

تعليق fridka ...  

salut berbache, à travfers tes réponses on voit un peu mieux en toi
merci titof pr tes info


الأربعاء, مايو 14, 2008 10:49:00 ص

تعليق البرباش ...  

@ تيتوف: مشكور خويا العزيز ع الاهتمام، و المعلومات

@ فريدكه: شكرا... و شكرا على المرور


الخميس, مايو 15, 2008 7:27:00 ص

تعليق brastos ...  

مـّاله "بالطبيعة" نمـّـاله ... ؟؟... حلوّه برشه : "بالطبيعه" ...ـ
:)


الخميس, مايو 22, 2008 12:30:00 ص

تعليق البرباش ...  

@ براستوس: كيف عجبتك، هذيكه الفايدة... مرحبا بيك


الخميس, مايو 22, 2008 12:39:00 ص

تعليق غير معرف ...
 

نقولو برج بيزاpisa موش بيتزاpizza


الأحد, مارس 14, 2010 8:10:00 م

تعليق غير معرف ...
 

www.2fes.com شروق فاس لأحلى ناس وبس


الثلاثاء, مارس 23, 2010 1:25:00 ص

تعليق 2fes ...  

http://2fes.com/vb


الثلاثاء, مارس 23, 2010 1:28:00 ص