الجمعة، نوفمبر 30، 2007 14:44
الهداري الفارغة: , ,

انو البطالة تاكل البلاد... هذا شيء وارد و يصير في جميع بلدان العالم المتقدمة منها قبل المتخلفة و كل مجتمع تلقى عندو طريقتو الخاصة في إنو يتأقلم و يتكيف مع المشكل هذا و لو انو الفرضيات و الحلول تبقى محدودة بشكل أو بآخر...

انو الانسان يدخل يتعلم في صنعة و هو قرب ع الثلاثين، ما عادتش ظاهرة غريبة، بالعكس هي مبادرة باهية انو الشخص هذا فد م البطالة و حب يعمّـل على روحو... يعطيه الصحة و ربي يعينو و يهدي امثالو.


انو البنات ما عادش لاقين رجال... هذا أمر واقعي و العنوسة في المجتمع متاعنا ما عادتش حاجة نادرة و لا مشكل يقلق برشا... انو الطبيبة تاخذ عامل بسيط في مغازة حاجة واردة و صايرة، يقولوا مكتوب صحيح، لكن كيف تجي للرسمي، هذاكة ش لقات و كيف ما يقولو: عصفور في اليد و لا ميا ع الشجرة... صحّـه لأمو هو اللي دبرها.





انو الحاكم يحاول بش يتعامل بأقصى ماهو ممكن مع المشكل هذا، حاجة هايلة ياسر و لو إنو ... لكن تقعد الجهود حاجة تبعث بصيص من الأمل عند البعض... حتى كيف تكون الحلول في بعض الأحيان عقيمة و السلبيات متاعها أكثر من إيجابياتها، المفيد ثمة حاجة و ثمة حركة و الحركة بركة...و حتى كيف نحبوا ننقصوا م البطالة نقوموا نخلقوا مشكلة ما أكبر (إيه نعم، ما أكبر) اللي هي البطالة المقنعة، و هي إتو عباد تخدم على غير ما تعمل حتى شي (موظفين يوقع تعيينهم دون أن تكون ليهم مهمة محددة) و كيف نشوفوا ما يمكن (مش يمكن، حاجة أكيدة) بش تشكلو الظاهرة هذي من عبء على الدولة... ما نلقاو ما نقولو كان ميسالش، آش جرالو، و بره قاعدين يقبضوا في شهريات من غير ما يخدمو (جات عندهم و بش تولي مشكلة)،ماهو خير م اللي تلقاهم بطالة لا خدمة لا ڤدمة (ع الأقل بالطريقة هاذي يضمنوا الڤدمة... الڤدمة بثلاثة نقط فوق القاف) و انا م العباد اللي يقولوا في الحالات اللي كيف هاذي: ما يسالش، في التراب و لا ...


انو أصحاب شهادات التعليم العالي، يشاركوا في مناظرات ما تتطلبش أكثر م الباك كمستوى أدنى للترشح... ولات حاجة عــــــــــــــــادية جدا، لكن انهم ما ينجحوش في المناظرات هاذي و ثمة شكون من غير حتى شهادة الباك يعدّي معاه (و في رواية أخرى ما يعدّّيش جمله) و ينجح، حاجة تقلق و تفدد برشه... يعني رضينا بالهم و الهم ما رضاش بينا

انو أساتذة يخدموا كـمعلمين و أساتذة تخدم في مدارس المهن و اساتذة تنوب المعلمين في غياباتهم و أساتذة تخدم في المخابر في المدارس و المعاهد... ولات جاجة عادية

انو الدولة تبعث حملة لتشغيل أبناء العائلات المعوزة... حاجة خارقة للعادة، و ش خير من انو نخدّموا الزوّالي، صحيح البطالة مش مسيبة حد: لا زوّالي و لا مبسوط، لكن المبسوط ينجم يدبر راسو و ما يحيرش (ع الأقل في مصروفو) لكن الزوّالي راهو يحير في أبسط الحاجات على خاطرو ما عندو حد، كان ربي و الحاكم و يعطيه الصحه الحاكم كيف يخمم فيه (و يبجّـلو على غيرو)....

انو اللي يبعثولهم بش يخدّموهم في إطار الحملة هاذي، يخدموهم في خطط أقل م المستوى المتحصلين عليه، حاجة مفروغ منها... هات خدّمني تو و من بعد يعمل الله دليل





لكن...

انو يتم استغلال الحملة هاذي في غير الإطار متاعها... حاجة تقلّق برشا

انو شخص مش متحصل على الباكالوريا جملة واحدة، يتم تعيينو كــمعلم في مدرسة ابتدائية... حاجة مش في بلاصتها

انو المدرسة اللي يتم تعيين الشخص هذا للعمل بها، تكون تقع في قلب مدينة من أكبر المدن في البلاد. و انو المعلمين أصيلين الجهة و اللي ثمة شكون عندو فوق الـ12 سنة خدمة مازالوا يخدموا في الارياف المجاورة للمدينة على خاطر أعدادهم (مش كان الأعداد، ثمة حاجات أخرى تدخل في التقييم) ما تخوللهمش بش يدخلوا يقرّيوا في وسط المدينة... حاجة مش اللي هي

انو الشخص اللي تم تعيينو هذا أصيل المدينة... حاجة تحيّر

انو الشخص هذا، يعطوه جدول ما يعجبوش (الأقسام حكايتهم فارغة و المواد مش اللي هي، ما هاش متاع المواد الخصوصية اللي تجيب الفلوس) ياخي يطالب بإنو يبدلولو الجدول... حاجة تضحّك

انو تتم الاستجابة للمطالب (الشرعية) اللي تقدم بيها الشخص هذا، و يتم تبديل الجدول متاعو بجدول معلم آخر عندو ما لا يقل عن 20 سنة في ميدان التعليم... حاجة تبهّت

انو أولياء التلاميذ يتشكاو م المستوى متاع الشخص هذا و اللي بدا ينعكس على مستوى أبناءهم... حاجة منتظرة

انو تتم الاستجابة لطلبات الأولياء و ترجع الأمور إلى ما كانت عليه (يعني الوليدات الصغار بالكل، ما يسالش يقرّيهم معلم دون المستوى، ش جرالو، يفهموا و الا عنهم ما فهموا، هوما أصلا مازالوا صغار و مش فاهمين خليقة ربي)... حاجة تبعث ع الأمل

انو الشخص هذا و من بعد الحديث اللي تقال الكل، يكون لاباس عليه (ما هوش زوّالي)... حاجة تبكّـي




قريتها:
مشاركة هذه التدوينة:
E-Mail Facebook Twitter Blog Buzz
تعليق chiheb ...
 

هذا هو العالم الثّالث ياغالي ( لم أقل المتخلّف)


الجمعة, نوفمبر 30, 2007 4:28:00 م

تعليق Wanted ...  

ya walla 7wal !!
Vraiment zeddet karrahtni fi hel bled !


الجمعة, نوفمبر 30, 2007 7:16:00 م

تعليق sahrawitn ...
 

khouya .berbech rabbi ikhallik allez y berbech etteberbich elli youje3 rahi ... 3la khater fi lebled tchouff ken elli i9oull loumour 5/5 amma binhom w bin arwa7hom i9ollek wakla b3ath


الجمعة, نوفمبر 30, 2007 8:49:00 م

تعليق Big Trap Boy ...  

أهلا بالبرباش، حبيت نقوللك برافو على المدونة الجديدة والواعدة

بالنسبة للموضوع هذا وحسب رأيي الخاص يكون أحسن أنك تعطينا أكثر تفاصيل باش الحالات هاذي ما تقعدش في النظري والعمومي، يعني كان لزم تعطينا المدرسة والجهة وموش لازم حتى إسم الأستاذ

حسب رأيي هكاكة يكون أصلح وإنتي أعلم بما يصلح بيك

:))


الجمعة, نوفمبر 30, 2007 9:12:00 م

تعليق cactussa ...  

مستهترين بالمستوى التعليمي للصغار لين ردوهم إمهمشين ما يفهمو شي حتى كي يبدا ولدك ذكي يرجعوهولك مصطك.
أما كان نزيدو نبربشو تو نطلعو أطباء و مهندسين ألله أعلم منين جابو شهايدهم.


السبت, ديسمبر 01, 2007 8:23:00 ص

تعليق البرباش ...  

مشكورين على مروركم...
يا بيغ تراب بوي: أصبر برك، المليح يبطى، و كيف ما قلت انتي: كل واحد أعلم باللي يصلح بيه... و على فكرة، هي معلمة مش معلم


السبت, ديسمبر 01, 2007 8:20:00 م