|
الأحد، مارس 29، 2009
01:02
|
|||||
|
|
 |
||||
|
دخلت للدار، م الباب نشم في ريحة التاي الاخضر المنعنع... ندخل لبيتي، نحل الاورديناتور، تخلط عليّ الوالدة تجري تقوللي: برباش، تحب نجيبلك كاس تاي نجاوبها: هات! تهم بش تمشي للكوجينة، نصف خطوة و اتعاود ترجعلي تقوللي: كيفاش اتحبّو؟ كنت معوّدها اني نجاوبها على حسب نوع التاي اللي نعرف أنّو موجود... لكني المرة هذي، و كنوع م المشاكسة... و بكل هدوء و لا مبالاة قلتلها: هات تاي احمر كان عندك تتفاجا م الإجابة الغير منتظرة و تقوللي: و انا منين بش نجيبهولك التاي الاحمر؟ نجاوبها: ماك سالتني، هاني قلتلك آش نحب! تقعد تغزرلي شوية، و بنبرة كلها حنان تقوللي: ما تحبّش كويس تاي اخضر، منعنع، يعمل ستة و ستين كيف  نعمل روحي كيف اللي ما عينتيشنقوللها: و الله ماذا بيّ على كويس تاي احمر كان ثمة! و نكمّل: كان ما ثمّاش مايسالش! تڤحرلي على فرد جنب، دليل على انو حديثي موش عاجبها، تتبدّل النبرة متاعها إلى ما يشبه التهديد تقوللي: آ، بابا برّه عرّس على روحك، و اتشرّط على بنت الناس كيف ما تحب! و همّت بش تمشي... نجاوبها: (ندوّح في راسي) كيف نعرّس... اللي ما نحكم علاها اتطّيبلي التاي الأحمر، و الاخضر... و ما نشربو كان شطار زادة تمشي و تخلّيني... لكنّي سمعتها و هي اتمتم وحدها بنبرة كلها سخرية و تقول: ههههه، مسهلو يا وليدي... برّه لو كان لقيت صحة عليك... اتشرّط و مد ساقيك، قد ما تقدر...  و جابتلي كاس التاي الاخضر، شربتو و انا فمي ساكت. اما قعدت نتسائل بيني و بين روحي... ياخي للدرجة هذي صعيب انو الواحد يلقى بنت الحلال اللي اتطيبلو التاي على زوز انواع؟؟  BONUS: بما انها الحياة طبعا مشاركة بين زوز، فقط للعلم بالشي، نعرف نطيّب القهوة راهو... خاصة كيف تكون من نوع النسكافي... 
|
|||||
|
|
قريتها: | ||||
|
مشاركة هذه التدوينة:
|
|||||
الاشتراك في:
تعليقات الرسالة (Atom)
allah ykoun fi 3ounha bent le7lel elli bech tekhedhha!! hhhhhhhhhhhhhhhhh
Mouch s3ib ya barbéch !
ama 9olli t7abbou bel bondo9 wala bellouz kés ettéy ? :))
@ الغير معرّف: و علاه مسكينة... إلا عاد إذا بش تكون ما تعرفش اتطيّب التاي... وقتها مساكين أحنا الزوز... هههههههه
@ خليل: نعرف اللي موش صعيب... و زيد مانيش متشرّط برشا، حتى لو كان التاي يكون بالكاكاوية، قابلو...
P-:
jetik fi thé hak 3aris lo2ta zay may2oulou fi masr !!
ija n5allass 3la 5ouya kes tey achtar fel kahwa, w 3la kestik zéda!!! hihihihi
يا ولدي ماو يلزم تتأقلم مع الموجود و تعرف تجيبو التّاي الأحمر
ياخي صحّة راس هي؟
أما هاني نقلّك: كان ما تلقاش التاي الأحمر، أشرب الأخضر.. ماهوش دوني زادا
أما حاجة برك.... ردّ بالك تطيح للتاي بالكاكاويّة.... على خاطر، وقتها، حتّى التاي الأخضر يا ذنوبي كان مازلت تخلط عليه :-))))))) ههههه
@ كاكتوسا: P-:
@ باج: علاش لا... ههههههه
@ ولد بيرسا: الواحد يرضى بالموجود لين ربّي يجود...
هههههههه... تقول انتي اكبس تلقى ما ترخف من بعد
P-:
إرسال تعليق