|
الأربعاء، يناير 16، 2008
19:00
|
|||||
|
الهداري الفارغة:
كاباس
|
 |
||||
|
رغم أني عديت كعبة لا... إلا أني كنت عندي شوية أمل... قلت شكون يعرف؟ كيف هي الحكاية بروموسبور... لعل تخطفشي! على خاطرني نعرف روحي مزهار و ش ما يجي تخطفلي في الحكايات الفارغة. لكن... للأسف، البارح جاني اس ام اس... يتأسفولي فيه على خاطرني ما نجحتش.
ما عزّو بيّ في الحكاية الكل، كان هاك العشرة آلاف متاع التمبري... و المشيان و الجيان (والتمشوير) اللي طلع بالفارغ نصبّر روحي و نقول كيف ما يقول القايل: من فم البير و لا من قاعو، خير م اللي ننجح في البروموسبور توّه، و نولّي نطمع في بقية التصفيات متاع الكاباس، و في الآخر ترصّيلي كيف كيف... عاد من تو خير... رعم اني حبيت ننجح، ع الأقل في المرحلة هذي، مش على خاطرني نحب ننجح و إلا م العباد اللي ما تتحملش الفشل (بالعكس، التدوبيل ولّى هو العادي في الحكايات هذي)، لكن قلت ع الأقل نفرّح العايلة، خلّيهم يعملوا جو... خليهم يفرحوا بالله، على خاطرهم الدار مش فاهمين منها حتى شي (هو كيف تجي للرسمي، أنا بيدي مانيش فاهمها الحكاية كيفاش بالضبط... و ما نتصوّرش كان ثمة شكون فاهمها على قاعدة، كيف ما يلزم)، يعني يكفي أنّي نقوللهم راني نجحت و نورّيهم الإرسالية اللي جاتني ع البورطابل... و ندز فيها اني فرحان بش نطير بـالفرحة الدار كيف يشوفوني فرحان، تو يفرحوا، من غير حتّى ما يسألوا كيفاش و لا علاش... و تولّي عاد تجي الطّامة و العامّة تبارك و تهنّي و لو كان لزم يتذبح فيها علّوش و تولّي فيها قعدات و شيخات... خلّي العباد تاكل... لا قعد. الله غالب، مش كاتبة...
|
|||||
|
|
قريتها: | ||||
|
مشاركة هذه التدوينة:
|
|||||
الاشتراك في:
تعليقات الرسالة (Atom)
kima kolt enti: yssir 3arrjel
Nchallah 5irha fi ghirha
برباش خيرها في غيرها... أخطاك من مهنة الأستاذ... هاو وجيعة راس ولات.. إضرابات و شهرية هكاكة و برة... و تلامذة لا يقراو لا شي...
على كل حال انشالله ربي يناولك إلي تطلب بغض النظر شنوة هو
برباش طارق عندو الحق والله ما تربح كان وجيعة الراس والالم هههههه اللطف عليك هاك ارتحت مها وربي يسهلك في ما خير
desolé barbech
je suis sur que tu a pleins d'autres qualites et que tu bouré de talents.cherche dansune autre direction.
raby em3k sadi9i
يا برباش يا خويا
انسحبت مالدور الاول ههههههه
مزمرة عليك
الدورة الجاية موش باش يحطوك راس مجموعة ههه
طارق الكحلاوي:
الشهرية هكاكة و برة ؟؟؟
واحد يخدم 16 ساعة في الجمعة و ياخذ 700 الف في الشهر
ما نتصورش فم شهرية خير من هكة في تونس (مقارنة بعدد السوايع)
يا برباش يا خويا عارفك راجل و تسلكها و تعديها على خير إن شاء الله .. كلنا نمروا بفترات صعيبة ... لكن موش مشكل
إن شاء الله المرة الجاية و بالكشي ولدي و لا بنتي يولي يقرا عندك
كيما قلت في تدوينتك: حتى حد ما فاهم حتى حاجة...
زد على ذلك : الشنقة مع الجماعة خلاعة..
و الكاباس ما تنجمش تكون بأي شكل مقياس يحكم على كفاءة المتناظرين...ليست إلا ضربة حظ...أو بالأحرى : ضربة كتف..
نشاء الله القادم يكون أفضل يا برباش
نعرف خويا البرباش اللي انتي ماكش تستجدي في عطفنا لكن ما يمنعش اللي انتي تفرهدت شوية وقتلي عبرت...أنا أول عام بعد ما تخرجت صبّيت مطلب و بعثولي الاستدعاء لكن مامشيتش يعني خسرت المقابلة بالغياب...و من وقتها حلفت عليها...الحمد الله اللي وقتها ما ثمّاش تمبري ب10 آلاف...اخزر للحكاية من زاوية عندكشي عندي...و ما كذبوش اللي قالوا العبرة بالمشاركة و الله لا يقطعلنا عادة كيما تقول انتي
;-)
أخـتـي "قــرّايــة" مالــبــريــمــة، اتــحــضــّر فــي الــدكــتــوراه و نــاجــحــة الأوّلــة فــي الدفــعـة مــتــاعــهــا و مــاســتــير بـ"مـنــســيــن تــري بــيــان" الـلــّي يــقــلــّك، حــاصــيــلو، مــشــات تـتبــولــد قــالــت انــعــدّي الــكــابــاس "تــوريــست" ، هــوكــي روّحــت مــحــصــّــنة مــضــمــّنـة... مـانــجــحــتــش :)
المــفــيد، الــكــاباس مــنظــرهــا مــوش للـنـّاس الــكــلّ و خــصــوصـا الــنـّاس الــلّي تــســتــاهــل تــنجــح، ســيــّب عـلــيــك
ناري نا على البرباش وليدي موش قتلك مشي حويجة باش تلقى كتيف باهي يسلكهالك؟ هاو عنادك و تبربيشك فين وصلك!أنا الي زاد على مابي كيفاش ايناس هانم منجحتش حبيتها تنجح باش يبقى البرباش عبرة لمن يعتبر!
خيرها في غيرها كيما قالك طارق فك عليك من خدمة التعليم هانا جربنا وحكاية فارغة .اما عطيك الصحة على البلوغ فيه اخراج باهي اول مرة نشوفو على فكرة الكونكسيون رجعتلي كان البارح
كابس ولات من المحتكرات و لاه عندك حق . و لات الناس تسمسر فيها كالعلالش و الصحيح جيبو ربي . أنا مستغرب من الصحافة التونسية قاعدة لاهية تعلق على حوايج فارغة و تشبك بين الناس و الفنانين و متعلقش على الخنار إلي صاير في البلاد من الرشاوي و التكنبيس على الزوالي و المزمر إلي يتسلف في 10 د متاع التنبري و ركوب نهار الإمتحان . أحنا مناش طالبين باش تنجحو المزمرين لكن نحبو شوية شفافية و نزاهة في المناظرات باش الناس ناكل الخبز معكم . طو بربي قلي هذا بهيم و مستك و ناجح بفوسكة و الرشوة في القراية و بو مدير عام و لا ....
تلقاه يزاحم فاك الزوالي و نابغة و ناجع متفوق في القراية .
alah ghaleb nchala fi mé a7ssan w star rabi illi inti mékech m3amel 3liha sinon raw saretlek azma nafssiya ech ken bech ykharjek minha!
مشكورين على مروركم و تعليقاتكم و تمنياتكم و تعازيكم و ما إلى ذلك...
@ طارق: عندك الحق، اما أرجع زاده لكلام كلاندو، يعني الشهرية مش ضعيفة لهذي الدرجة (خير من بلاش)...
@ عمروش: هاني قاعد نلوّج
@ كلاندو & فريــراس: الله غالب...
@ واروولف: رتّحك ربّي كيف سهّلّك فيما خير (ان شاء الله).
@ سناوسي: نورمال... علاش انا قلت يصير ع الرجال
@ المعلمة مها: (و لو صعيب تكوني اللي في بالي) مرحبا بيك... ههه... زارتنا البركة
@ أبو ناظم: ش من فك عليك ياراجل
@ الغير معرّف: ش علينا، ربّي يهدي ما خلق
@ أنجل: لا لا،تّى وقت اللي همّلت عليها و ما كتبتش.. قعدت نورمال ما صارلي شي... مرحبا بيك
الله غالب خويا برباش
إن شاء الله عند ربي خير. أما عند ها الرشواجيه .............
شرجي وزيد شرجي
alibabaa.maktoobblog.com
barbech yesser 9wey w mou3abber el clip elli 3additou..BRAVO
ne t en fait pas !!inchalah la prochaine fois c est pour ça vaut mieux pas passé!lakalb youja3 la chaye éna c est pour ça radia bel mission malgré eli ^privée je me dis même si je réussis j irais très loin !! alors !! inchalah tu auras chance ailleurs!!!
برباش :bagla leha الكاباس
يابرباش انا خوك جيت موخر و زادة علقت موخر عارف علاش علي خاطري مصدق اني الكاباس بقات كابوس وماهيش حاب يتنح زعمة الحل في حبل و الجبل والا نبدل الراس الي مرضو الكاباس وزاده معاه 10 الاف و مسلفها وكل عام ارجعها قبل الكاباس لاخري ب10 ايام تعرف علاش علي خاطر خوك فلس لا في جيبو ولا في راسو //رصيدي لا يكفي لاجراء عملية جمع 10+10 علي خاط دزت معاه ركوبات و دينارات زادة ادفع 10 الاف تروح دورو لا.................
ايه يا دنيا ... الله غالب خويا البرباش. إحنا ابكلنا في الهوى سواء. عدينا الكاباس حتى إتكبست روسنا ومافماشي فايده. الحاصل ربي اوجهك واوجهنا خير.
إرسال تعليق