السبت، نوفمبر 21، 2009 21:30
الهداري الفارغة: , ,


كيف ما اليوم... تحديدا نهار الاربعاء 21 نوفمبر 2007 كانتلي أول تدوينة [مدونة قيد الإنشاء]...

عمناول كيف ما اليوم، كنت كتبت تدوينة [عام... على التدوين] و كنت وقتها اتخذت قرار شبه نهائي بمغادرة هذا الفضاء الافتراضي اللي كل ما يتعدى الوقت يزيد تعاسة و كبّي و ڤينية.

دخولي للبلوغسفير كان و هي تعيش أعز فتراتها... دون أي علم بوجود مجمعات تدوينية كيف التن-بلوڤ أو غيرو، نتذكر أنّي بعد كتابتي لثاني تدوينة قعدت نتسائل بيني و بين روحي على سبب عدم وجود زوار، و تعليقات... و طرحت السؤال على شهاب اللي كان لخوه علي الفضل في دخولي للعالم هذا (هو لا فضل لا حتى شي، تي ساعات نقول كلها جرايرو) و اللي اعطاني الرابط متاع التن-بلوڤ و الايمايل متاع حسين و طلب مني نراسلو بش يزيدني في الليستة

و اتزدت في الليستة... و بديت شيئا فشيئا ندخل في الأجواء و في الكواليس... هههههه

و كان المسلسل متاع حومة البلوغسفير في رمضان 2008... مسلسل اتوقف عند الحلقة عشرين و ما كانلوش بش يكمل (رغم اللي ثمة ثلاثة حلقات حاضرين إلا انو ما وقعش نشرهم)، البلوغسفير دخل في دوامة متاع صراعات تخلي أي كلمة تتقال يلزم يتقرالها ألف حساب.

و طارت النفحة شيئا فشيئا... حتى أني (و رغم توفر الوقت) وليت نبخل بش نكتب تدوينة من حكاياتي كيف ما كان الأمر عليه قبل (رغم اللي ما عندي كان ما نحكي)، و اقتصر التدوين على بعض الكتابات القصيرة في مدونتي قلق... و حاجات أخرى

اليوم، و رغم أنو الناس تستنى في نفس جديد للبلوغسفير، خصوصا بعد الأحداث الأخيرة اللي صارت أوائل الشهر هذا و اللي أثبتت أنو مازال للبلوغسفير دور و تأثير (رغم محدوديتو... و اللي ظهرت زادة أنو برشا مدونين م اللي كنا نحسبوهم صيودة، طلعوا قطاطس، متاع كلام فارغ و شعارات رنانة كيف ما نقولوا في الابتدائي)، و مازال ثمة بصيص من أمل.

و رغم أنها الاجواء ما تشجعش بتاتا ع الاستمرار في الكتابة... إلا أنو نلقى روحي مجبور ع الإستمرار في التواجد داخل هذا الفضاء اللي كوّنت فيه علاقات و صداقات اتطور البعض منها و اتجاوز مستواه الافتراضي و حتى الدنيوي في بعض الحالات.

مش بش نسمي البعض لأنو الاكيد بش ننسى العديد... أما اهوكة يعرفوا أرواحهم.

شكرا ليكم الكل... بدون أي استثناء.


قريتها:
مشاركة هذه التدوينة:
E-Mail Facebook Twitter Blog Buzz
تعليق WALLADA ...  

كلّ عام و أنت و مدوّنتك بألف خير


السبت, نوفمبر 21, 2009 10:10:00 م

تعليق من بلد القيظ ...  

مبروك أخي البرباش وكلّ عام وأنت بخير ،العاقبة لمائة عام تدوين ،ههههههه علاش لا


السبت, نوفمبر 21, 2009 11:06:00 م

تعليق esprit primal ...  

Joyeux anniversaire, inchalla kol 3am winti bkhir, w7keyetik il fergha min 7asan il a7sen, fi takathour wizdiha.
Quant au feuilleton , ne t'inquiète pas, wras khouia, le jour où je monterai ma boite de production (bech nsamiha nakhla mich cactus), nkamlouh il mouselsil.
Ce qui est sûr c'est qu'indépendamment des différents et il3ark wil ma3rouk (bien que je ne comprends tjs pas pkoi, puisque l'espace est assez grand pour tout le monde et lé binetna lé 7artha lé wartha) ton blog plait à tout le monde, car tes histoires sont celles de monsieur tout le monde, le tunisien de la rue et tous on s'y retrouve et on rit. Longue vie à tbarbich w7keyet fergha, ama 3abilna le blog wmatkhalihech ferigh wala t7ib narmloulek fan club pour que tu saches le nombre de tes lecteurs fidèles qui qui attendent impatiemment comme un enfant goulu chaque nouveau post.  


السبت, نوفمبر 21, 2009 11:06:00 م

تعليق H.B.J ...  

akhyeb blog tounsi c ton blog

mosslssel tafeh mtaa 2008


الأحد, نوفمبر 22, 2009 12:17:00 ص

تعليق البرباش ...  

@ ولادة: شكرا ليك

@ شهاب: ميا، علاش لا... هههههه

@ روح بدائية: شكرا ليك ع الكومنتار... البلوغسفير هذي عاملة كيف الحصّيلة اللي يطبلها صعيب ياسر كان مازال ينجّم يخرج منها

@ حميدة (اللي مسمي روحو مدون وطني): شفت هاك الطريقة الأولى اللي اتحدث عليها الدكتور طارق الكحلاوي في اختيار منهج الرد عليك... أنا لو كان جيت بش نرد عليك ما نختارها كان هي راهو... أما مانيش بش نرد عليك لأنو الكومنتار متاعك كان عبارة عن إبداء لرأيك في مدونتي، و انتي حر و أنا حر...
و كيف ما قال المتنبي:
إذا أتتك مذمّتي من ناقص .. فتلك الشهادة لي بأنّي كامل
شكرا ليك


الأحد, نوفمبر 22, 2009 12:55:00 ص

تعليق bent 3ayla ...  

يااااا محلاه التعليق على المدونة، خير م الفايسبوك. و محلاها مدونة تبربيش و حكايات فارغة كي نلقاوها هبطت بوست جديد. حتى لو كان بوست احتفالي.. لوهلة رجعلي احساس المتعة وقت اللي نلقى البرباش هبّط بوست.
كنت نحلو افلاين (خاطر ما نعرفش وقتاه تقص الكونكسيون) و نمشي نجيب زادي و زوادي و نبدا نقرا و نقرمش في الشبيس
توحشنا خرافاتك برباش، ارجعلنا عاد


الأحد, نوفمبر 22, 2009 10:43:00 ص

تعليق Selim ...  

Joyeux anniversaire et j'espère qu'on continuera à te lire pour longtemps:)


الأحد, نوفمبر 22, 2009 10:49:00 ص

تعليق AntikoR ...  

joyeux blogoversaire, ton blog est vite devenu l'un des best of sur la blogosphère tunisienne, un blog à ne pa rater, un blog ou se mêlent avec intelligence tous les aspects de la vie du tunisien , donc bravo et bonne continuation

berbich wech ihemmek ,


الأحد, نوفمبر 22, 2009 11:25:00 ص

تعليق tounssi el barra ...  

البلوغ نتاعك طيارة. شخصياً ماضيعت حتى تدوينة.
J'était un ancien blogueur depuis l'an 2006,en 2009 ceci est mon premier commentaire sur un blog,je suis réguliérement cette blogo depuis des années ,ton blog sort du lot,vraiement bravo et bonne continuation.
PS: pour jma3et el RCD elli hattou un commentaire sur ton blog,barbech la3bedd el koll ta3ref leurs niveaux intellectuels et éducatifs (torbia,+culture) donc un conseil ne prend plus le temps de lui répondre


الأحد, نوفمبر 22, 2009 2:26:00 م

تعليق chanfara ...  

نشاء الله كل عام و مدونة نبربيش حية بخير

اللّي متأكد منو أنا إنّو نوعية حكاياتك و تبربيشك يخلي مدونتك من أحسن ما وجد في هذا الفضاء الإفتراضي.

ما تغيبش علينا برباش، رانا عايلة وحدة

و التافهين اللي مازالو ما يعرفوش شمعناها تدوين مالأحسن الواحد يطفيهم


الأحد, نوفمبر 22, 2009 5:04:00 م

تعليق قطّوس الزبلة ...  

مانيش باش نقول شي ع المدوّنة هاذي خاطرها تنجّم تحكي على روحها وما تستحقّ شهادة حتّى حدّ، سواء على مستوى المضمون اللي ما تلقاه كان فيها أو طريقة إخراجها المتميّزة أو عدد زوّارها، منين تدوّرها تدور.

باش نقول حاجة وحدة لصاحب التّعليق الرّابع اللي الوطنيّة قريب تخرج من خشمو:

وقت اللي تفهم اللي التّدوين ما ينجّمش يكون طريقة باش تلقى خدمة كيف الرّجال، ووقت اللي تفهم اللي التدوينة ما يجيش نلصّقو فيها سيرة ذاتيّة CV http://cvhmida.blogspot.com/2009/02/my-cv-fr_05.html ، ووقت اللي تخرج من حالة الرّهاب اللي حاصر روحك فيها، وقتها فقط تنجّم تقيّم مدوّنات العباد، وموش العباد الكلّ زادة. 


الاثنين, نوفمبر 23, 2009 12:01:00 ص

تعليق cactussa ...  

barbech t'es parmis mes meilleurs blogueurs ,walaw fil mosalsil ajaltli 3irsi !! :)
kol 3am winti mawjoud binetna !


الاثنين, نوفمبر 23, 2009 9:38:00 ص

تعليق black dark ...  

شكراً لك برباش، مدونتك كانت و لاتزال أحسن المدونات إلي ديما نستنى فيها (الله يرحم والدين ال google reader :) ) كذلك معرفتك نعتز بيها.
شكراً

Ghaza Horra


الاثنين, نوفمبر 23, 2009 8:18:00 م

تعليق Bej ...  

خمسة و خميس عليك و عيني ما تضرّك!!
ثمّة جماعة كيف الخوانجيّة، ماتاخوش عليهم سي برباش!
هالجماعة ما تعجبهم كان حاجة الخوانجي إلّي كيفهم... و في القياس حكمة للّي يفهم ...


الاثنين, نوفمبر 23, 2009 9:14:00 م

تعليق غير معرف ...
 

Bon continuation !
J'aime bien ton blog
ma tabtach 3lina 3ad :) sa3a sa3a eddakarna b poste :)


الثلاثاء, نوفمبر 24, 2009 1:02:00 ص

تعليق البرباش ...  

@ بنت عايلة: ياخي الشيبس ديمة متوفر عندكم في الدّار؟؟

@ كارب ديام: شكرا ليك

@ انتيكور: الله يخليك... تي هاني نبربش، ولا على بالي

@ تونسي البره: مرحبي بيك يا خويا... ديمة طل

@ الشنفرى: أكيد اننا عايلة واحدة، و المسلسل يشهد... غير انتي ما تغيبش برك، رالك كثرتلها

@ قطوس الزبلة: انتي ما قلت شي ع المدونة، و انا ماني بش نقول شي على هاك السيرة الذاتية... خليني ساكت، هههه

@ كاكتوسا: تي اخطاك م العرس متاع المسلسل (ماهوش هاك الكل راهو، ههههه)... استدعاني في عرسك و توة نكتبلك ارتيكل تهتز له أركان البلوغسفير، هههههه

@ غزة حرة: انا اللي نعتز اكثر بمعرفتك يا خويا

@ باج: يا خويا انا ما ناخو على حتى حد... ما نمشي كان باللي تقوللي عليه طاسة مخي

@ غير معرف: حاضر باش يا خويا... غالي و الطلب رخيص


الثلاثاء, نوفمبر 24, 2009 1:38:00 ص

تعليق غير معرف ...
 

kol 3am wenti w bloguék b5ir ya a7la barbech
matesma3 klém 7ad w bloguek 3sal eddenya
sada9ni kyokthor 3lia strésse w n7éb netfarhed n7él kén el page hedhi
rabbi m3ak w bonne continuation :)


الثلاثاء, نوفمبر 24, 2009 3:25:00 م

تعليق ETC...ثم ...  

برباش : ما يبقى في الوادى كان حجرو هههههه
façon de parler
صامدون صامدون


الأربعاء, نوفمبر 25, 2009 6:45:00 م

تعليق Mouadh ...  

bourjouliya m3allem ya barbache
ton style est tres originales wetbarkallah 3lik
matrakkazech yasser m3a la3bad sinon tet3eb
ana awel blog na9rah beddarja c celui de
Moro kan 3raftou, 3jebni melewel mais mba3d wella ighafess
mais comparé a ton blog , ça n'a rien a voir


الاثنين, نوفمبر 30, 2009 11:57:00 ص

تعليق غير معرف ...
 

يعطيك دودة يا برباش


الخميس, ديسمبر 17, 2009 12:08:00 م