الخميس، أبريل 02، 2009 03:34

قاعد نخدم على روحي... ينوقز البورطابل... جاني ميساج

عادة، نتجنب اني نستعمل البورطابل وقت الخدمة... لأسباب تفرضها طبيعة الخدمة بيدها، و احتراما لنفسي و لغيري... و لطبيعة العمل (ما تشلقوش عاد، فضحتوني في التدوينة اللي قبلها هههههه)

ما يجيش دقيقتين، و ينوقز البورطابل... ثمة شكون يطلب فيّ


نثبّت في النومرو (92.328.920) ما نعرفوش... لكن شكون يعرف

البرباش: ألو عسلامة

يجاوبني صوت متاع كهل، بين الأربعين و الخمسين من عمرو

السيّد: (بنبرة مرحة) اهلا... عسلامة

البرباش: وي... اتفضّل

السيّد: بالله سامحني، غلطت و بعثتلك ثلاثة آلاف فرنك ع النومرو متاعك

نفهم طبيعة الميساج اللي جاني

البرباش: أي، يظهرلي بالحق

السيّد: بالله لو كان تعمل مزيّة... ترجّعهملي على خاطرني حاجتي بيهم

البرباش: باهي، داكوردو... الله يبارك

البرباش: اتو ربيّع ساعة من زمان و نرجعهملك... ما ثمة حتى مشكلة

السيّد: بارك الله فيك.. أما بالله ما تبطاش

البرباش: باهي باهي، خاطر تو مشدود في الخدمة... تو من بعد

رجعت نخدم على روحي... اول فرصة نتفاضى فيها، قلت ما فيهاش

خير البرّ عاجله... نجبد هاك البورطابل... نقرى الميساج


نقيّد النومرو في عقاب كاغط نلقاه قدامي... و نحاول اني نرجع للسيد فلوسو



التيليكوم تتأسفلي... رصيدكم غير كافي... للحظة شكيت اني في عوض نبعثلو ثلاثة آلاف، قيدت ثلاثين ألف (الخير كثير و لا خوف علينا من الفقر، اللي يقوللك الفلوس ندز فيهم بالركبة هههه)... نعاود الحكاية... كيف كيف، رصيدكم غير كافي


نمشي نثبّت في الكونت متاعي... نلقى روحي مكسبني 1270 فرنك... كيفاش جات هذي... غريبة!


نرجع للميساج اللي وصلني نلقاه السيد باعثلي ميساج من عندو بنفس الصيغة اللي تبعث بيها التيليكوم عبر خدمة موبي رصيد MobiRacid


حمدت ربي ع الفقر و الـ 1270 اللي عندي في الكونت انهم ما كانوش اكثر من 3000 فرنك و إلا راهو اتعدّات عليّ و اترزيت فيهم...

عاد لقيتش اكثر من اني نكافأ السيد هذا بنشر رقمو على صفحات البلوغسفير (و الفايس بوك، بما انهم التدونات متاعي قاعدين يهبطوا اوتوماتيكيا على الفايس بوك) على ما ياتي.

92.328.920


و ردّوا بالكم تحصلوا...
قريتها:
مشاركة هذه التدوينة:
E-Mail Facebook Twitter Blog Buzz
تعليق samsoum ...  

هههههه ما اصح رقعتو الحاصل وحّدنا التوانسة في التكنبيس...


الخميس, أبريل 02, 2009 6:53:00 ص

تعليق Bachbouch ...  

hahaha!!!
ja y9atter fil 3sal...


الخميس, أبريل 02, 2009 6:58:00 ص

تعليق kmr ...  

wallahi c une bonne idée!! très ingénieuse!! merci pour le tuyau!! :)



ps: bien sur je parlais de la solution illi l9itha inti, tafdh7ou 3la net, ama jaaaaaaamais je n'ai eu l'idée de faire comme lui!!! :)


الخميس, أبريل 02, 2009 8:02:00 ص

تعليق 3onsor ...  

أحسنت يا برباش


الخميس, أبريل 02, 2009 8:46:00 ص

تعليق AntikoR ...  

كيفاش ؟؟ يجيك ميساج من موبيرصيد في حين أنّ رصيدك ما تزادلو حتّى فرنك؟؟

مقرصنين التيليكوم و إلاّ كيفاش؟؟

est ce que je peux mettre un lien vers ta note sur le mur du groupe Tous ensemble pour que Tunisiana et Tunisie Telecom baissent les prix?


الخميس, أبريل 02, 2009 9:02:00 ص

تعليق cactussa ...  

ena kalamni we7id 1h de matin mara y7ib 3ala dinar w ya7ki kayinou 3tani malyoun ! 3ala bleto 5alit dinar 3andi ! :)


الخميس, أبريل 02, 2009 9:26:00 ص

تعليق ART.ticuler ...  

علاش الواحد يبيع روحو ويبيع كرامتو ب-3d ؟؟؟الحادثة ربما تبدو بسيطة لكن تقول أكثر مما يقول علماء الاجتماع شكرا برباش على لفت الانتباه


الخميس, أبريل 02, 2009 9:40:00 ص

تعليق Galerie Cesar ...  

Désolé si je fait de la pub sur ton blog mais je serai trés connaissant si tu ne l'enleve pas :)
Creation sites internet en Tunisie et creation graphique


الخميس, أبريل 02, 2009 6:28:00 م

تعليق البرباش ...  

@ سمسوم: ههههه عندك شك في هذا


السبت, أبريل 04, 2009 3:21:00 ص

تعليق البرباش ...  

@ بشبوش: يا خويا اسكت برك... تي خطاتني شعرة لا نحصل


السبت, أبريل 04, 2009 3:22:00 ص

تعليق البرباش ...  

@ العنصر: أهلا بيك


السبت, أبريل 04, 2009 3:23:00 ص

تعليق البرباش ...  

@ خ.م.ر: هههههههه... فكرة جديدة


السبت, أبريل 04, 2009 3:23:00 ص

تعليق البرباش ...  

@ أنتيكور: لا يا ولدي، يهديك... ش من مقرصنين التيليكوم، ساهل هو؟

السيد باعثلي ميساج م النومرو متاعو لا غير

و خوذ راحتك، المدونة مدونتك...


السبت, أبريل 04, 2009 3:25:00 ص

تعليق البرباش ...  

@ كاكتوسا: ههههههههه... انا مرة قبل جاوني ثلاثة أبّالات من عند نومرو ما نعرفوش... كلمتو، راجل كبير كيف كيف زادة

ألو ولدي بالله راهي الكميونة طاحت بيّ في الكياس في الصحراء... تعمل مزية تبعثلي دينار بش انكلّم الجماعة يشوفولي حل.

الحق متاع ربي، عطيت فيه الثقة، بعثتلو الدينار، عاود طلبني و شكرني و قاللي انو في الليل يعاود يبعثهولي....

هاني مازلت نستنى.


السبت, أبريل 04, 2009 3:28:00 ص

تعليق البرباش ...  

@ السيد اللي حط الإشهار: ريقل حوّك... ربي يكون في العون


السبت, أبريل 04, 2009 3:30:00 ص

تعليق البرباش ...  

@ أرتيكولي: ثمة عباد قلال همة يا خويا... الله غالب هذيكة الدنيا

شكرا ليك


السبت, أبريل 04, 2009 3:30:00 ص

تعليق the Knight ...  

Cet histoire m'est passée moi aussi il y a deux jours.
ama essayed ma kaberchi kerchou, juste 7at 1000dt.
c'était un numéro Tunisiana el le voilà : 21348711
en recevant le message j'ai trouvé qlque chose de bizarre puisque l'expéditeur normalement soit Tunisiana alors que cétait le numéro lui même et c'est comme ca que je l'ai reconnu.


الأحد, أبريل 05, 2009 1:54:00 م

تعليق mackguyver ...
 

kol ma trabbi tssib* kèn bnèdem w far5 ethib


الجمعة, أبريل 24, 2009 12:32:00 م

تعليق Anonymous ...
 

3adha 3lik enfin


الأحد, سبتمبر 27, 2009 10:09:00 ص