الجمعة، يناير 23، 2009 04:30
الهداري الفارغة: , ,

صيف 2004... مازلت كيف تخرجت من بعد مسيرة دراسية موفقة ياسر دامت سبع سنوات درست خلالها في قرابة الأربعة مؤسسات جامعية كللت أخيرا بالحصول على شهادة الأستاذية و ما أدراك...

بطلب م الأونكادرور (المؤطّر معناها) متاعي في مشروع ختم الدراسة، التحقت بالعمل بإحدى الورشات التابعة لأحد المعامل بالعاصمة... ما كانتش خدمة بقدر ما هي مساعدة لعرفي وقتها، عماد، اللي كان بصدد تحضير مشروع تابع رسالة الدكتوراه اللي كان يحضرلها... الخدمة ما كانتش تهمني وقتها و لا المشروع اللي نخدموا عليه، فقط كانت فرصة نضمن بيها تواجدي بالعاصمة (مع تغطية خاصة و شخصية للمصاريف) لأنها كانت مناسبة للبحث عن عمل (قار) بحظوظ أوفر...

الوقت متاع الخدمة كان في الأوقات اللي كان فيها المعمل مسكّر، ستة سوايع عقاب الليل... كنا خمسة م الناس، عرفي عماد، مرتو هيفاء، العبدو لله و زوز تقنيين ساميين خريجي أحد المعاهد التكونولوجية.

موش عارف علاه، علاقتي بهيفاء كانت متوترة منذ بداية تعارفنا (في إطار الخدمة طبعا)، يعني كيف ما يقولوا لا نهضمها و لا تهضمني، هكاكة لله في لله، كره م النظرة الأولى... لكننا كنا صابرين و نتعاملوا مع بعضنا في إطار الخدمة اللي قاعدين نخدموا فيها ليس إلاّ.

وقت ما كنت طالب نقرى على روحي، اتعرّفت على سلمى (كان سبقلي و اتحدثت على سلمى في تدوينة [الكاباس... السنة الحميدة] و تدوينة [الكاباس... عند الإمتحان])... يا حسرة

آش علينا، نتذكّر أنو الصيف هذاكة، عندي اختي روحت من فرنسا (هي بيدها اللي تحدثت علاها في تدونة [الكذب... في المصالح جايز]، اللي سكنت معاها وقت اللي كنا نقراو) و جابتلنا معاها الخيرات السبعة مصلّي ع النبي، حلوى و شكلاطة و كادوات... نتذكّر وقتها أنّي غافلت الجماعة و خبّيت باكو متاع شكلاطة على جنب.

قمت بإرسال الباكو شكلاطة في شكل طرد بريدي لسلمى، و تجنبا لأي مشاكل قد توقع فيها الطفلة لو قام أحد أقاربها بقراءة اسم المرسل، حطيت فقط اسم المعمل و عنوانو على الطرد و قمت بإرسالو... مع بطاقة بريدية فيها زوز دبادب بيض و مكتوب عليها من الخلف كيف ماهو مكتوب ع التصويرة

صادف وقتها أنو سلمى ما كانتش في الدار بصدد إمضاء العطلة الصيفية في البلاد، مما خلّى الباكو شكلاطة يدور يدور و يرجع لمرسله... لمقر الشركة، طبعا.

و صادف أنو هيفاء مرت عرفي تحولت للبوسطة لتفقد ش ثمة جديد في صندوق البريد، تلقى التوصيل، مشات تشوف ش ثمة... ما فهمت شي م الحكاية غير انو ثمة باكو شكلاطة و معاه بطاقة بريدية، مكتوب علاها ما ذكر سابقا... و طفلة اسمها سلمى في الوسط

ندخل للمعمل... نفرح انو لليوم الثاني على التوالي هيفاء مرت عرفي ماهيش موجودة، ع الأقل العبد يخدم براحتو من غير تنبير زايد و ما تلقاهوش عينيه تلعب يمين و يسار رادد بالو لا يغلط هكة و إلا هكة على خاطر ثمة شكون شاددلو ڤارد و يستنالو في أقل غلطة بش يشنّع بيه... و الحقيقة اكتشفت بعد بمدة انو هذا ما كانش شعوري وحدي، بل كذلك شعور الزوز تقنيين اللي كانوا معايا زادة...

لكن اللي لفتلي انتباهي هو مسحة الحزن اللي كانت بادية على عرفي سي عماد، الراجل ما عوايدوش، مستانس ديمة يضحك و يلعب و الغش اللي تتسبلنا فيه مرتو ينحيه هو بلعبة و ضحكة... و بحكم العلاقة اللي كانت تقرب للصداقة (اللي كان لازم منها وقتها بش الخدمة تمشي) أكثر منها لعلاقة عرف بالمستخدمين اللي عندو، فلقيت روحي نجبد فيه بالحديث

البرباش: أيواه... شنوة امورك امالا

عماد: (حاطط يدّو على خدو) هاني، نبلع و نغص

البرباش: (بنبرة تدل على الدهشة متاعي) ماو لاباس؟

عماد: (يتنهد) لاباس لاباس

البرباش: (نعمل روحي قاعد نغزر لمختلف أرجاء الورشة اللي كنا قاعدين فيها) ياخي وينهي هيفاء، عندها مدة ما طلّتش، و موش عوايدها؟

عماد: (يزيد يتنهّد مرة أخرى) لاباس علاها... لاباس

البرباش: (ما فيها باس نكذب كذبة بيضاء، و لو أنّي كنت متاكد اللي هو يعرف حقيقة شعوري) و الله مخيبها الورشة بلا بيها

عماد: هاني شادة دار بوها، عاملة جو

البرباش: ماو لاباس... إن شاء الله خير

عماد: و الله ماني عارف يا برباش يا خويا... صدقني مانيش عارف شبيها

البرباش: (نقعد ساكت، موش عارف إذا كان من حقي نسأل ش ثمة او لا) ...

عماد: (يكمّل كلامو، بنبرة تدل على دهشتو) روّحت للدّار، نلقاها لمّت الفليجة متاعها و خارجة... يا بنت الناس ش ثمة، شبيك

البرباش: أي

عماد: قالتلي، منو هكة ع الأقل قول لصاحباتك اللي مرتك شادة معاك في الخدمة، ما غير ما يبعثولك الجوابات متاع حبك درباني ع الخدمة

البرباش: آش من جوابات؟

عماد: و الله ما ندري علاها، أنا هذاكة اللي مهبلني

البرباش: أي

عماد: مشات لدار بوها، مشيت في الليل قلت تو نلقاها هدات و راضت و عملت عقل و نفهّمها بالمعقول

البرباش: نورمالومون

عماد: ياخي قعدت تصيح و تعيّط عليّ، و جابتلي كارت بوستال فيها زوز دبادب و رماتهالي على وجهي

البرباش: (بديت نشم فيها قارصة) ياخي

عماد: مكتوب علاها... و الله ما نعرف عليه درى ش مكتوب علاها

البرباش: (نتلّف في الجرّة) تي آش علينا

عماد: (يضرب في كف بكف، و يعيّط) و الله خاطيني يا برباش يا خويا، و الله ما نعرف علاها هـ المصيبة هذي منين طلعتلي

عماد: (يواصل بنفس النبرة) و الله ما نعرفها سلمى هذي اللي تحكي علاها، و زيد المرى حاسبة روحها شدتني بالكمشة كيف شلقت بالجواب قبل ما يوصللي زادة

طبعا كنت متاكد انو انا عندي دخل في الحكاية... في بالي انو الكولي اللي فيه الباكو شكلاطة ما وصلش لسلمى، اللي كانت وقتها في البلاد تصيّف مع بقية العايلة و ما تمكنتش بش تمشي تجيبو م البوسطة... لكن من كلام عرفي حسيت انو الحكاية فيها جواب، تهيّألي للحظة انها سلمى عملت بالعاني و انها استلمت الباكو شكلاطة و حبت تعمللي مفاجاة و تبعثلي جواب (ع العنوان متاع الشركة، العنوان الوحيد اللي عندها)

و طبعا، قدام الحالة و الهيجان اللي كان عليههم عرفي عماد، فضلت انو نسكت... إلى حين

البرباش: (عامل روحي ما في بالي بش) جواب زادة!

عماد: (بنبرة المغلوب على امرو) يا ريتو جواب برك، طلع كولي كامل و فيه كادوو زادة

البرباش: كولي... ضربة واحدة!

عماد: امالا... ماهو باش تختم...

عماد: (يسكت شوية) على خاطر شوية عليّ جواب برك... أهوكة اللي بعثت بعثت معاه كادوو زادة فرد مرّة

البرباش: (مع ابتسامة مبهمة ارتسمت على ملامحي) و شكلاطة اللي يقوللك

ما نعرفش علاش اندمجت ياسر في الحديث مع عماد عرفي... و من غير ما نشعر، يمكن على خاطرني ملم بجميع جوانب الموضوع (اكثر م اللي عايشين القصة بيدها)، اعتقدت لوهلة انو حكالي ع الحكاية الكل و ما جبتش خبرة اللي هو ما جبدش حكاية الشكلاطة على لسانو جملة واحدة... و اتفطنت لذلك دوب ما نطقت الكلمة، لكن هيهات

عماد: (يڤحرلي على فرد جنب) شكلاطة... ؟!؟

البرباش: (نحاول نتلّف الجرة بابتسامة مشلقة ياسر و نبرة تدل ع التبهليل) شكلاطة... آه شكلاطة!

عماد: (يكبّش) و انتي شكون قاللك على حكاية الشكلاطة؟

البرباش: (وقفت الزنقة للهارب) شنوة... موش انتي قلت توة باكو شكلاطة!

عماد: لا لا، ما قلتش؟

عماد: (يقعد باقي يڤحرلي على فرد جنب) منين في بالك بيها حكاية الشكلاطة؟

البرباش: (زايد، ما عادش فيها) ماهو متاعي الكولي هذاكة

عماد: (يزيط و يعيط) و علاه يا برباش يا خويا... آش عملتلك بالله... و آش مدخلني أنا بش صاحبتك تبعث الكولي باسمي... علاه بجاه ربي علاه؟

البرباش: (نسكت شوية، نستناه لين يهدي شوية... و بنبرة كلها خجل) لا لا، موش مبعوثلي... أما انا بعثتو و رجعلي

عماد: و علاه؟

البرباش: سلمى مشات تصيّف، ماهيش في الدّار

عماد: صارة... سلمى هذي تابعتّك!

البرباش: تي امّالا فاش نحكيلك من قبولي

عماد: (تتنحّى عنّو مسحة الغضب اللي كانت غامّة الملامح متاعو) أي أي... احكيلي

البرباش: آش بش نحكيلك، تي ماني قلتلك... بعثت الكولي فيه باكو شكلاطة و كارت بوسطال لسلمى، ياخي بالزهر متاعي اهوكة رجعوا، و كمّل زادوا طاحوا بين يدين هيفاء مرتك بش تزيد ***** على قاعدة

عماد: معناها انا خاطيني الكولي، و اللي فيه!

البرباش: تي أي... تحب نحلفلك ياخي

عماد: و الله عندي نهارين مخي بش يتحرق، نلوّج على شكون هذي سلمى اللي باعثتلي الكولي و ما نجمتش نعرفها

البرباش: لا لا، خاطيتك سلمى هذي... ما تعرفهاش

و على غير ما كنت متوقّع، فإنو عرفي عماد فرح بالحكاية، بل و اكثر من هكاكة فإنو عنّقني بين يديه (كأننا أصحاب قدم تقابلنا بعد طول غياب)... و أجهش بالبكاء



قعد يبكي، و يتهز و يتنفض، في موقف خاشع ساده صمت رهيب... حتى م الزوز تكنيسيانات اللي يخدموا معانا بطلوا الخدمة وقتها و قعدوا يغزرولنا ماهم فاهمين حتى شي

من حينو، خرجنا م المعمل انا و عماد عرفي و قصدنا دار انسابو... وين قابلت هيفاء مرتو و حكيتلها الحكاية الكل، و زدت دعّمت كلامي بالوثائق و الحجج (بما انو وقتها كنت مستانس أي ورقة ملزوم ما تلقاها فوق مني) و كلمت سلمى بالتليفون و جرجرتها في الحديث ع الكولي متاع الشكلاطة و كانت هيفاء وقتها حاطة وذنيها ع السماعة

البرباش: صارة لقيت التوصيل في الصندوق متاع البوسطة

التليفون: ...

البرباش: لا لا، رجع الكولي و وصل

التليفون: ...

البرباش: (ندوّح في راسي) الله غالب، موش كاتبتلك الشكلاطة، صحت لغيرك

و زدنا قعدنا شربنا الڤازوز و الڤاطّو اللي جابتهولنا حماة عماد عرفي (اللي هي مرت بو هيفاء) اللي فرحت ياسر بعودة المياه لمجاريها، و خصها شوية لا زغردت (نتصور المانع هو أنها ما تعرفش تزغرد)... و من بعد مشات هيفاء جابت الفليجة متاعها و روحت مع راجلها للدار...

و أحنا (انا و الزوز تكنيسيانات اللي معايا)... خذينا بقية الليلة كونجي


قريتها:
مشاركة هذه التدوينة:
E-Mail Facebook Twitter Blog Buzz

الجمعة، يناير 16، 2009 14:45
الهداري الفارغة: ,

معرفتي بسي عبد العليم عندها قريب العامين، كنا تقابلنا في دورة تكوينية تابعة الخدمة و قعدت الإتصالات جارية ما بيناتنا ما اتقطعتش، و رغم الفارق متاع السن اللي ما بيناتنا اللي يتجاوز العشرين عام (سي عبد العليم عمرو قريب الخمسة و خمسين) إلا انو تولدت ما بيناتنا علاقة صداقة...

معرفتي بيه في الاول كانت بسبب انو كنا مجبرين على تقاسم غرفة الفندق لأنو اللي عمل القايمة جابنا بالصدفة مع بعضنا، و كانت صدفة خير أننا تقابلنا و اتعرفنا... حكالي سي عبد العليم من جملة ما حكالي أنو كان متزوج و طلّق بعد مشاكل كبيرة صارتلو مع مرتو السابقة، و أسرّ لي أنو قاعد يلوّج على بنت الحلال، و لمّحلي انو لو كان عرضتني حويجة ما فيها باس لوكان نقوللو عليها لعل الصنارة تغمس خاصة و أنو كيف ما يقول هو احنا البنات عندنا في البلاد مزيانات ياسر.

ما عكستوش، لكن زادة في نفس الوقت ما أكدتلوش اني بش نسعالو في الحكاية... مجرد موافقة متاع تطيير ملام لكن عمري ما حطيت في مخي أنو يمكن يعتمد عليّ في حاجة كيف ما هذيكة...

برّه امشي يا زمان و ايجى يا زمان... توة عام لتالي عاودنا تقابلنا مرة اخرى في اجتماع تابع الخدمة. عند الفطور، حسيت بيه كيف اللي اتعمّد أنو يقعد مع جنبي، م الأول ما أعطيتش انتباه للحكاية لكن من بعد فهمت علاش، وقت ما اتلفتلي بعد ما كملنا الفطور

سي عبد العليم: (مع ابتسامة كبيرة ياسر غطات معظم الملامح متاع وجهو... مع نبرة أقرب ما تكون للتوشويش) ش عملتلي في هاك الحكاية يا برباش يا وليدي؟

البرباش: (نغزرلوا على فرد جنب، ناسيها الحكاية جملة واحدة) أما حكاية... ياخي أحنا بيناتنا حكايات!

سي عبد العليم: (بنبرة تدل ع الدهشة) كيفاش تو، ناسيني جملة واحدة... لا لا عاد ما تقولليش هكة يعيش وليدي!

البرباش: (مازلت ما فهتوش على شنوة قاعد يلمّح) لا لا، ش من ننساك... تو هذا كلام!؟

سي عبد العليم: (تعاود ترجعلو الإبتسامة متاعو) شفتلي حكاية المرى اللي حكينا فيها آخر مرة

البرباش: (مازلت ما فهمتوش فاش قاعد يحكي، و الحكاية غابت على مخي جملة) أما مرى!

سي عبد العليم: (يولّي يتعاوج و يتكلم بنبرة متاع طفل صغير) موش اتفاهمنا بش تشوفلي طفلة م البلاد غادي كان هكة انعرسوا بيها...

البرباش: (توة برك بش فهمتو على شنوة قاعد يلمح من قبولي) آااااه... الطفلة اللي بش انعرسوا بيها

سي عبد العليم: (بنبرة ما انجمش نوصفها، لكنها التعابير متاع وجهو تجعلك تشعر كانو حاشم، ثمة مسحة متاع خجل مع طريقة في التصرف كأنو يتدلل الراجل) تي ايــه، ماهو قلنا تشوفلنا طفلة من بحذاكم... على خاطر انتوما البنات عندكم في البلاد مصلّي ع النبي عليهم مزيانات، عيني ما تضرهم

البرباش: (نولّي نجبد عليه بالمرتاح... اللي جابتو رجليه، العصا ليه) آه، البنات عندنا مزيانات... و آش بيهم بناتكم

سي عبد العليم: (نفس النبرة ما حبش يبدّلها) لا لا، ش من بناتنا... بناتكم أزين




البرباش: (لا حول و لا قوة إلا بالله) باهي سي عبد العليم... تو نشوفلك... و لو كان ثمة حاجة كاتبة تو ربي يسهّل فيها

سي عبد العليم: نعرف صاحبي راجل، و الله من أول نهار عرفتك فيه حاسبك كيف خويا

كان يقوللي وليدي، من بعد قلب الفيستة و ولّى يقوللي خويا، و ساعات وخيّ... الحاصل كان هذاكة آخر نهار نسمعوا فيها يقوللي وليدي، و حتى اسمي ما عاودش نطقو كيف ما هو، ولّى ما يقوللي كان بربوش.

اتفاهمنا، أنو بش نقول للدار انو عندي واحد صاحبي يحب يعرّس بطفلة م البلاد، و هو ظروفو كذا و كذا... لو كان ثمة حاجة تو نقوم انا بربط الخيوط... و اجري عند الله.

الحق متاع ربي، ما وصلت للدار، كنت ناسيها جملة واحدة الحكاية... اتقابلت في عشيتها انا و مجموعة م المدونين (اكسكيزا و بالملوان و فري راس، كانت اول مرة نتقابلوا فيها) عملنا قعدة صغيرة في احد مقاهي شارع الحبيب بورقيبة و كملت قعدت بتت ليلتها في تونس و ما خلطت من غدوة للبلاد إلا و كنت ناسي الهدرة جملة واحدة.

بره اتعدّاو جمعتين، و عاود كلّمني سي عبد العليم، يسأل آش عملتلو في هاك الحكاية... وقتها برك وين عاودت اتفكّرتها، و طبعا ما يجيش منو نقوللو انّي ناسيها حكايتو جملة، طمنتو انو الجماعة (اللي هوما الدار) قاعدين يلوجوا و لو كان ثمة حويجة اللي تعجب، تو نقوللوا عليها ديركت

قعد مارجني... ما يعدّيليش جمعة و إلا زوز من غير ما يكلّمني و يسأل ش عملتلي في هاك الحكاية

عاودنا اتقابلنا في اجتماع آخر الصيف اللي (نفس الإجتماع اللي حكيت عليه في تدوينة [تحطيم... الهوة الرقمية])... وقتها جبدتو على جنب في مرة م المرات حبيتا ني نفضها الحكاية

البرباش: باهي سي عبد العليم، هات خلي نتفاهموا اسّاعة ع المرى كيفاش تحبها

سي عبد العليم: (بنبرة تدل على انو يحب يتظاهر بالخجل) تي شنوة تو يعيّش خويا

البرباش: (خويا مرة أخرى، بعد ما كان يقوللي وليدي... بره مايسالش) تي امالا كيفاش تو بش انلوّجلك؟

البرباش: (نسكت شوية) هكاكة... من غير ما نعرف المواصفات اللي تحب علاها؟

و قعد سي عبد العليم يوصف و يوصّف... الراجل يستخايل و يحكي... الحاصل، م الآخر، الراجل يحبها سابڤة و جرّاية و ما تاكلشي شعير

باختصار و بكل إيجاز... يحبها في الثلاثين، مزيانة برشا برشا هاك الزين متاع الڤورّة، و زيد احنا كيف ما يحكي هو البنات عندنا في البلاد مزيانات فوق اللازم، معناها يلزمني نلوّجلو كعبة م المـمّو، كعبة متاع ثم ثم... و بالطبيعة (هذي الحاجات الثانوية) يلزمها تكون تخدم، بشهريتها، و في سلك التعليم على خاطر القسمة ع الله م النساء اللي تخدم في الإدارت وقت كامل ما يلقاوش الوقت بش يتلهاو برجالهم و بديارهم...

قعدت نسمع فيه بكل رحابة صدر (حاجة عادية عندي وسع البال)... محاولا أني ما نضحكش قدامو، لكن للصبر حدود

البرباش: (ننطق، ما عادش فيها) تي ازززح... ياخي هذي لو كان بش نلقاها، نقوللك علاها

سي عبد العليم: علاه يا برباش يا وخي

البرباش: تي عاد ماهو جحا اولى بلحم ثورو... ناخذها لروحي خير!

سي عبد العليم: لا يا راجل... انتوما عندكم البنات بزايد مصلي ع النبي... شوف وحيدة نتّكّى علاها و من بعد تو نتولهاو بيك

مانيش فاهم شنوة حكاية البنات اللي عندنا في البلاد، ياخي مش كلها تونس و الباهي و الخايب في كل بلاصة و إلا شنوة حكايتو سي عبد العليم هذا... الحاصل أنا من طريقتو في الحديث اللي ما عجبتنيش خذيت قراري أني يستحيل نلوجلو، و قلت ملزوم ما يجيه نهار و يفد و يقلق منّي

لكن شي... الراجل عبدني و المعبود الله، ما تتعداش جمعة إلا ما يكلمني بالمرتين و الثلاثة، و يتشكالي م الوحدة و القلق و الميزيريا الكلبة اللي عايش فيها وحدو بلا مرى... لين مرة نطقت و قلتهالو

البرباش: (تي أخطاني عاد) بالله سي عبد العليم تو كيف تحكيلي هكة... ياخي ناويني بنت بلادي بش تجيك للتمرميد و الڤينية اللي تحكي عليهم

سي عبد العليم: (بنبرة تحمل في طياتها ابتسامة مصطنعة يحاول يتدارك بيها الموقف) لا لا يا برباش يا وخي، ماهو تو نوالفوا على بعضنا و نحطوا الراس ع الراس و عيشتنا تولي زاهية.

البرباش: (ع الأقل ظهر يعرف اللي الدنيا فيها زهو و طرب) هيا باهي... كيف ظهرت بش تولي زاهية

روّحت من بعد للدار ناسيها الحكاية كيف ما قبل... لكنو سي عبد العليم عبدني و المعبود الله، ما يعدّيش نهارين و إلا ثلاثة إلا و يتكلّم يسأل على آخر أخبار الموضوع... و كنت دائما ناخو بخاطرو و نقوللو اللي الدار قاعدين يلوجوا، و أنو الحكاية ماهيش ساهلة بالطبيعة و يلزم العبد يحط رجليه على قاعدة صحيحة موش اللي يجي... و طلبني مرة و أنا قاعد نحكي مع أختي، اللي استفسرت من بعد ع الحكاية و قلتلها أنو راجل كبير في العمر طلب منّي أنّي نلوجلو على طفلة م البلاد يعرّس بيها

و امشي يا زمان و ايجى يا زمان، اتعدّى الصيف و جات العودة المدرسية... جاتني نهار أختي اللي سبق و حكيتلها حكاية سي عبد العليم معايا...

أختي: برباش... صاحبك هاك اللي يحب على مرى، مازال يلوّج؟

البرباش: أبـّـي... و مارجلي الكبدة متاعي!

البرباش: (نسكت شوية) علاه... ش مفكرك فيه؟

أختي: لا على خاطر ثمة أستاذة تقرّي معايا في الكولاج... قلت لو كان تكلملها صاحبك هذا و يتعرفوا على بعضهم

البرباش: آهــه... و قدّاش عمرها صاحبتك هذي؟

أختي: عمرها سبعة و ثلاثين داخلة في الثمانية و ثلاثين

البرباش: و زعمة ترضى بيه عمرو فوق الخمسة و خمسين؟

أختي: نتصور ترضى،.. علاش لا!

أختي: (تسكت شوية) أما...هو راهو ثمة مشكلة صغيرة!

البرباش: مشكلة شنوة زادة؟

أختي: الطفلة... وصيفة

البرباش: شنوة وصيفة، سمراء... محسوب على بيوضيتو هو!

أختي: لا لا... ماهيش سمراء... وصيفة وصيفة

البرباش: (تضرب في مخي انو سي عبد العليم قصدني فقط بحثا عن طفلة مزيانة م البلاد) شنوة معناها وصيفة...

أختي: وصيفة، كيف ما جماعة الأفريك

البرباش: (بنبرة كلها لا مبالاة) أنتي قوللها صاحبتك، و لو كان عينتها، تو نولّي أنا نقوللو... و لو كان هكة نعطيوهم نوامر بعضهم، و هوما يدبروا روسهم

و كلمت أختي صاحبتها، و الطفلة وافقت مبدئيا على التعرف على سي عبد العليم قصد الزواج

و كلمت سي عبد العليم، و حكيتلو ع الطفلة، و عبثا حاولت إقناعو أنها وصيفة، الراجل ولّى تقولشي عليه هو اللي يعرفها و يحاول يفهّمني أنها سمراء عاقدة... في الآخر كيف ما لقيت بيها وين مشيتلو بهواه و اللي يقول هو مبروك.

و تبادلوا نوامر بعضهم، و قعدوا مدة تقرب الشهر و هوما يحكوا بالتليفون، و منها قرروا أنهم بش يتقابلوا.

اللي حكاتهولي أختي ع الطفلة أنهاعندها كرهبة، تحب تظهر قافزة، رغم اللي هي دوبها دوب روحها... يعني كيف تسمعها تحكي على خرجاتها و سهرياتها تقعد حالل فمك، بينما كيف تجي للواقع تلقاه لا علاقة بالشي اللي قاعدة تحكي فيه، و تتفخر بروحها أنها تعمل فيه.

و اتقابلوا... و ما كانش ثمة القبول م الطرفين.

و كلّمني سي عبد العليم بالتليفون و قاللي هاني تو في البلاد ايجى خ نشربوا قهوة مع بعضنا قبل ما نروح...

اتقابلنا في مدخل البلاد و قعدنا شوية نتحدثوا في الكرهبة، حاكلي سي عبد العليم أنو الطفلة ما عجبتوش م الوهلة الأولى، و زيد قعدوا شربوا قهوة قال بالك طباعها باهية و اتحب تهنّي روحها...

سي عبد العليم: نستخايلها سمراء هاك اللي تلقاهم عاقدين شوية، طلعت وصيفة و صيفة... تي أصلا حتى من شفايفها غلاظ و شعرها احرش

سي عبد العليم: و زيد فوق هذا الكل... متحررة ياسر يا برباش يا وخيّ

كانت هذيكة الجملة اللي عبدني بيها، و كان يدخّلها بين كل جملة و جملة من كلامو...

هيا برّه خدّم الكرهبة و قصنا ربّي ماشين بش نشربوا قهوة... و قعد سي عبد العليم ثنية كاملة كل وين يشوف طفلة في الكيّاس يتلفتلي و يقوللي

سي عبد العليم: (بنبرة كلها تحسّر) شوف مصلّي ع النبي... ما لقيت تودني كان بهذيكة يا برباش يا خويا.

و بديت نحس من نبرة كلامو انو ماذا بيه لو كان انعاودوا المعبوكة م الأول و جديد و لو كان نزيد نشوفلوا طفلة أخرى يتعرف عليها لعلّ و عسى يكتب بيناتهم المكتوب...

الحق متاع ربي ما كنتش مستعد بش نعاود نتمرج مرة اخرى بالتليفونات و هو يسأل و يلح في السؤال متاعو بش نشوفلوا طفلة... كنت ناوي بش انهزّوا لقهوة، تعتبر أعز ما ثمة في البلاد عندنا، القهوة فيها بدينارين و أربعمياة مليم، قلت مايسالش الراجل محسوب ضيفي و يلزم نفرح بيه... لكني لما فطنت بتلميحاتو لتكرار الحكاية مرة اخرى، و كيف وصلنا قدّام القهوة المنشودة، بدّلت رايي

سي عبد العليم: (يشيرلي بصبعو للقهوة، في نفس الوقت اللي قاعد فيه يلوّج على بلاصة يوقّف فيها الكرهبة) هذي هي القهوة

البرباش: (نسكت شوية) لا لا... زيد لقدّام، زيد لقدّام

و هزيتو لقهوة أخرى، هي زادة من أعز القهاوي في البلاد، و خاصة في الصيف... لكنها في الشتاء و كيف تڤيّن الدنيا تتحوّل في الويكاند الصباح لمكان تتلم فيه بنات الشارع، و أهوكة الجماعة اللي تلوّج ع اللذة الحرام (قدّاشني متربّي) تمشي لغادي و تفرز و تختار و تهز ما حاجتها، ما ثمة حتى حرج في الحكاية... و بالطبيعة الرّاجل ثنية كاملة عينيه تدور ع اليمين و ع اليسار يثبّت في البنات

وقفنا الكرهبة، و هبطنا

البرباش: (بنبرة كلها فخر و اعتزاز) هذي سي عبد العليم... أعز قهوة عندنا في البلاد

سي عبد العليم: الله يخليك يا برباش يا خويا

و دخلنا للقهوة، الراجل م اللي دخلنا فمو محلول ما سكروش باهت في عجب ربّي... البنات اللي قاعدين غادي الكلهم حاطين الحطة على اعلى مستوى، ماكياج سيس/دوز، اللبسة عرية و محزوقة اكثر ما يمكن بش تظهّر اكثر ما يمكن إظهارو، الدخان، بعض القعدات تلقى ثمة الشيشة حاضرة...

الحاصل سي عبد العليم قعد ما يغلق... و ضربة ضربتين يتلفتلي و يقوللي

سي عبد العليم: (باهت في عجب ربّي) يا برباش يا وخيّ... طل طل طل

البرباش: (نعمل روحي ما على باليش، و بنبرة كلها لا مبالاة) نورمال يا خويا... أحرار خلي يعملوا اللي يحبوا... أحنا لهنا في البلاد كل حد يتولهى بروحو و يجعلك تسلكها

كلمة لا بد انها تتقال، وجودي في حد ذاتو في المكان هذاكة في الوقت هذاكة خلى العديد م الحاضرين يتساءلوا عن سر الحضور متاعي، حتى انو أحد المسؤولين و يلقّب يالزڤط (كنت اتحدثت عليه قبل في تدوينة [البلدية... في خدمة المواطن]، تو ولّى عندو درى قدّاش من طفلة تحت امرتو يدوّر بيهم في الدولاب) ما نجّمش يمنع روحو من انو يجينا للطاولة اللي قاعدين عليها انا و سي عبد العليم و يحكي معانا مباشرة

الزڤط: (يحكي و عينو تغمز وحدها و لسانو يطرشق) آه خويا العزيز... حاجتك بحاجة

البرباش: لا لا، حتى شي... قاعدين نشربوا في قهاوي و برّه

الزڤط: (باقي يغزرلي، يهز في و يحط كأني ما عجبتوش) مش انتي البرباش؟

البرباش: أي، أنا هو

الزڤط: (يشيرلي لسي عبد العليم) صاحبك هذا... ما حاجتوش بحاجة

البرباش: (نبتسم) لا لا... جايين بش نشربوا قهوة و ماسين على ارواحنا

الزڤط: مرحبا بيك، و بضيفك خويا العزيز... لو كان حاجتكم بحاجة قولولي و ما تمشوا كان فرحانين راهو

هذا الكل و سي عبد العليم يغزر ماهو فاهم م الشي شي...

سي عبد العليم: شنوة هذا يا برباش يا خويا

البرباش: (بنبرة كلها بلاهة، انحاول في نفس الوقت انّي ما نضحكش قدامو) شبيك سي عبد العليم

سي عبد العليم: (يزفر بفمّو) أب ب ب... يا خويا بناتكم قدّاش متحررين!

البرباش: شنوة معناها متحررين سي عبد العليم... راك في تونس و عام 2008 يا راجل

سي عبد العليم: ش من تونس يا ولدي، نحنا في البلاد ما عندناش الشي هذايا!

البرباش: يزيك يا راجل، الله يرحم الطاهر الحداد

سي عبد العليم: عاد على حساب هكة، هاك الطفلة تتسمى عاقلة و نهشة جملة واحدة

البرباش: امالا ش في بالك... و الله جبتلك طفلة لا تلقى اختها في البلاد

البرباش: أما مايسالش، تو نشوفلك واحدة مزيانة تعمل ستة و ستين كيف

البرباش: (نسكت شوية، نحاول اني نمنع الضحكة متاعي من انها تخرج، في نفس الوقت ندوّر و جهي نقبّل لمجموعة م البنات قاعدين في تركينة وحدهم و ضحكهم واصل للشارع) تي شوف مصلّي ع النبي، و راس خويا العزيز المرة الجاية اللي ما تكون كان بلندة يا سيدي...

سي عبد العليم: (يمهمه) يعمل الله، يعمل الله

أحنا مازلنا قاعدين هكاكة نترشفوا في هاك القهاوي، و تتعدّى قدامنا طفلة، تتمختر في مشيتها، يجاها طفل من تالي يرمي يديه درى ش يعمللها، تتلفتلو، من غير ما تتنحى الإبتسامة متاعها من على فمها، و بنبرة كلها مرح تدل عبى تقبلها للحكاية تسبو سبّة تتكون من ستة أو سبعة كلمات كل كلمة انتن من اختها، و تمشي على روحها

سي عبد العليم: (يشهق فرد شهقة) شفت آش قالتلو يا برباش يا خويا

البرباش: (هذي هي الفرصة اللي يلزمني نستغلها) آه... امالا بش تسكتلو!؟؟

البرباش: ما ريتوش هو آش عمللها؟

سي عبد العليم: بالله، نورمال أنها تحكي هكاكة!

البرباش: و نورمال هو يعمللها هكاكة

الحاصل انو الراجل قعد يحل ما يغلق، و يضرب في أخماسو في أسدادو، ما لقى ما يقول...

و كمّلنا القهاوي و خرجنا و عاودنا ركبنا في الكرهبة مرّة اخرى و ثنية كاملة و انا نطمّن في سي عبد العليم و نهنّي فيه أنو ما يقلّقش روحو و ملزوم ما نلقالو الطفلة اللي تعجبو و الراجل فمو ما حلوش ما عدى بعض التمتمات الغريبة اللي تبيّن الشي اللي قاعد يدور في مخو.

من غدوة، ينوقز التليفون...

سي عبد العليم: (بنبرة كلها مرح) أهلا برباش وليدي... شنوة أحوالك

البرباش: (رجع يقوللي وليدي) أهلا بيك سي عبد العليم... لاباس يسأل عليك كل خير

البرباش: ش عامل انتي؟

سي عبد العليم: لاباس لاباس... اسمعني برباش وليدي

سي عبد العليم: (يسكت شوية) هاك الحكاية اللي حكلينا فيها البارح

البرباش: أي!

سي عبد العليم: من غير ما تقلّق روحك وليدي... يظهرلي بش ناخو طفلة من هنا م البلاد و انا رايض

البرباش: كيف ما يظهرلك سي عبد العليم... ساعة و الله حبينا انّاسبوك

سي عبد العليم: يا خويا و الله حتى أنا حبيت، اما الله غالب مكتوب

البرباش: مش مشكل... المفيد انتي تلقاك متهني و فرحان

سي عبد العليم: يعيشك، يعيش وليدي...

و كانت هذيكة آخر مرة يكلّمني فيها سي عبد العليم ليه تو قريب الشهر.


قريتها:
مشاركة هذه التدوينة:
E-Mail Facebook Twitter Blog Buzz

الجمعة، يناير 09، 2009 02:18
الهداري الفارغة: , , , , , ,

عام 1991... عمرى 13 عام، نقرى في الأولى ثانوي

آخر مرة شاركت فيها في مظاهرة، كانت في حرب الخليج... نقرى في الأولى ثانوي، فرحان بالحرب، ضربنالها جمعتين عطلة، و زيد حتى كيف رجعنا، كانت كل عشية ثمة مظاهرة، و ساعات نفصعوا ع القراية بش نشاركوا في مظاهرة... و ندخلوا نقراو ديركت من غير بطاقة دخول... غياب شرعي

كل عشية كانت ملزوم ما تكون ثمة مظاهرة، مرة التلامذة، مرة الاخوانجية، مرة جماعة الشعبة، تلقاني ندور عشية كاملة في البلاد نلوج منين بش تبدى المظاهرة، بش نبدى انعيّط... ما انروّح للدار كان و صوتي مبحاح ماعادش فيّ النفس.

نتذكر مليح نهارت اللي ضربوا الملجأ متاع العامرية، نهار الأربعاء 13 فيفري 1991... ما نتذكرش التاريخ و لا النهار بالطبيعة، لكن اللي نتذكرو مليح اني نهارتها نقرى ساعتين تكنيك م الأربعة للستة... و الأستاذ نهارتها قاللنا اللي احنا بش نصنعوا دارة كهربائية، بش يجيبلنا كمشة خيوط متاع ضو، كونتاكت و بريز و انبوبة و احنا نصنعوا الدارة الكهربائية وحدنا... قاعد نجري و نعيّط مع جملة مين يعيّط و مخي في الساعتين متاع التكنيك

الثلاثة متاع العشية، حلست روحي م المظاهرة و رجعت لليسي، قريت الساعتين، و خدمت السيركوي و جبتو صحيح، الأنبوبة شعلت... كنت الوحيد في القسم اللي عملت السيركوي صحيح... و روّحت فرحـــاااان

وفات الحرب، و وفات معاها المظاهرات... ما عاودت رجعت للأجواء متاع الشغب كان كيف وليت نقرى في العاصمة... الشغب ما كانش في القراية او في الاجواء متاع القراية... بالعكس، كنا سيستام إيكول و عباد جاية تقرى على أرواحها و آخر مين يتوقع أنهم يسألوا شنوة اللي قاعد يصير جملة واحدة.

نتذكر مرة داخلين للايكول، وقتها شايشة في البلايص الأخرى على حكاية الانتخابات متاع المجالس العلمية، قرابة العشرة بوليسية واقفين قدام الباب متاع الجامعة، ما تدخل كان ما تستظهر ببطاقة طالب... واحد م البوليسية خذالنا الكورات، منها قعد يغزرلنا في وجوهنا و يڤحرلنا على فرد جنب، لين اتلفتلو بوليس آخر و قالوا

البوليس: (بنبرة أقرب ما تكون للإستهزاء) لا لا، هذوكة جماعة الإيكول... خاطيهم مساكن، سيبهم

و كنا خاطينا بالحق... حتى في الإنتخابات متاع المجلس العلمي متاعنا، كانوا يحطولنا ليستة فيها زوز م الناس، بش نختاروا منهم زوز م الناس... و هز يديك م المرق، لا تتحرق

الجو كان في الكورة... كل ماتش دربي و إلا ماتش مع الإيتوال و كذلك البعض م الماتشوات متاع كؤوس إفريقيا، كان الدخول للملعب فيه عبارة على مشاركة في مظاهرة (كنت اتحدثت مرة في تدوينة [الكورة... و الستاد] ع الاجواء اللي سبقت الدخول لمقابلة كانت جمعت بين الترجي و الإسماعيلي)...






عام 2009... الايامات هاذم

نهار الاثنين 05 جانفي، اول نهار قراية بعد العطلة متاع الشتاء... وسط البلاد، مظاهرة متعدية... قرابة الميتين، ثلاثمياة ع الاكثر م التلامذة متاع الليسي متعدين وسط البلاد... دايرين بيهم قرابة ما يقابل عددهم او ينقص شوية بوليسية (بين اللي بالكسوة و السيفيل)...

المتظاهرين: لا إله إلا الله... و الشهيد حبيب الله

فكروني في الحلقة الأخيرة من مسلسل الخوالي (وقت ما كانوا بش يعدموا نصّار بن عريبي... و الأهالي منّعوه آخر لحظة من براثن المستعمر... و زيد كانت عندي نفس الزاوية متاع الرؤية م الفوق)...

المظاهرة بدات نصف النهار بعد انتهاء الدروس، و انتهات على الساعة الواحدة بعد الزوال... ساعة من زمان تكفي التلامذة بش يروحوا يفطروا و يرجعوا يقراو على أرواحهم العشية لا راو لا سمعوا

المظاهرة، ما كانش فيها حتى علم، لا علم فلسطين و لا حتى تونس... يا حسرة ع المظاهرات اللي كنت شاركت فيهم و انا صغير وقت حرب الخليج، كيف في كل مظاهرة ما يتحرقوش زوز و إلا ثلاثة أعلام متاع امريكا و بريطانيا و اسرائيل، تتسمى مظاهرة محتشمة






كيف كيف زادة، المظاهرة ما ضمت كان التلامذة متاع الليسي اكهو... ما نعرفش إذا كانت الحكاية متعمدة او انو إحجام بقية المواطنين ع المشاركة كان لأسباب اخرى.

يدخل واحد م الأساتذة، اللي ديمة يحكي باسم النقابة و الإتحاد العام التونسي للشغل للقاعة... ثمة اللي في بالو و اللي ما في بالوش... الأستاذ يجبد كمشة م الأوراق من تحت ضبوطو... بش يقرى بيان

الأستاذ: (...) و اليوم حيث بلغ عدد القتلى قرابة الثلاثمائة شهيد و الشهداء ...

البرباش: (بنبرة كلها دهشة و استغراب) تو داخلين ع الستة مياة راهم

الأستاذ: (بابتسامة مصطنعة) ايــه، في بالي... أما البيان هذا اتكتب في النهار الثالث للعدوان

ما نجاوبوش، لأنو زايد بش نقوللو انو كان م الاجدر لو كان بدلهت وحدو ع الأقل... نتلفت لزميل قاعد مع جنبي

البرباش: (بنبرة أقرب ما تكون للتوشويش) شنوة الحكاية؟

الزميل: هاو قالوا بش نڤرفوا ربع ساعة

البرباش: (مفجوع) ڤراف... علاه، فاش قام؟

الزميل: تضامنا، مع غزة

البرباش: (بصوت مرتفع، مجلجل، و ابتسامة المغلوب على امره) هيا انا خليني نمشي، ماكم تعرفوا الوضعية يا جماعة!

زميل آخر: (بإشارة بيدو يطلب مني أني نلتزم الهدوء) بره، بره على روحك... في بالنا بكل شي

نغادر القاعة و نمشي نخدم على روحي...

من غدوة، يجيني هذاكة الأستاذ، يعطيني ورقة صغيرة فيها أسماء بعض المعدات الطبية، قال انو قيمتها خمسة دنانير... يلزمنا نشروهم، تضامنا مع غزة

البرباش: و بعد ما نشروهم... آش بش نعملوا بيهم؟

الأستاذ: هاو قالوا بش يهزوهم لغزة

البرباش: كيفاش، بش اينجموا يدخلوا

الأستاذ: (يحاول يبلفطني) تي انتي اعمل اللي عليك، و خلّي البقية على ربّي

البرباش: (نفهم انو يحاول يبلفطني) تي آش من بقية، اخطاك م الهدرة هذي... هاو بش نقوللك على حاجة، حشمت لا نقولها في القاعة البارح، تو الجماعة يقولوا آش مدخلو

الأستاذ: شنوة؟

البرباش: العسّاس... ماو في بالك

الأستاذ: شبيه؟

البرباش: ماهو في بالك، عندو زوز يقراو في الجامعة و عيد بيه وقت التسجيل متاع السداسي الثاني

الأستاذ: أي، آش بش نعملولو؟

البرباش: كلّم الجماعة... كل واحد باللي يقدر عليه، انعاونوه

الأستاذ: (يتفجع، و بنبرة كلها تهويل) لا لا، و الله ما انجمها... ياسر عليهم الجماعة

البرباش: (نشد صحيح) شنوة اللي ياسر عليهم؟

الأستاذ: مازالوا كيف دفعوا للستة و عشرين ستة و عشرين... و زيد تو المساهمة متاع غزة.. و انكمل نقوللهم انعاونوا العساس

البرباش: (نحاول نفهمو بالمعقول) يا ولدي، ياخي الشي اللي كاتبو في الورقة، هذيكة حد نيتك بش يوصل لغزة... راهي بكلها محاصرة غادي

الأستاذ: أي، احنا نعملوا اللي علينا

البرباش: تي الأقربون اولى بالمعروف... غزة ع العين و ع الراس أما راهي موش خصيّصة للشي هذا، مشكلتهم هي في الحصار موش في المعدات هذي

الأستاذ: أي

البرباش: العساس يولي اولى بالفلوس هذي... نعملوا اللي علينا معاه خير

الأستاذ: لا لا، يلزمنا نساهموا في حكاية غزة

البرباش: تي انتي قوللهم و آش يهمك!

الأستاذ: (بنبرة كلها حذر) لا لا، لو كان نقوللهم تو ما عاد حد يساهم في حكاية غزة

الحق متاع ربي، مع كامل تأسفي و تحسري على الشي اللي قاعد يصير في غزة... ما نجمتش نشري هاك المكتوب في الورقة... الماء الماشي للسدرة، الزيتونة أولى بيه... مانيش متاكد انو المعدات الطبية اللي في الكرظونة بش توصل لغزة، لكني متاكد اللي فلوسي كيف نعطيهم للعساس بش يفيدوه...


قريتها:
مشاركة هذه التدوينة:
E-Mail Facebook Twitter Blog Buzz

الخميس، يناير 01، 2009 04:45
الهداري الفارغة: , , , , , , ,

تدوينة قصيرة... فقط بش نتمنى بيها عام سعيد لجميع الأصدقاء، المدونين، و القراء، و حتى اللي ما يقراليش ماذابيكم توصلولوا السلام...

وصلت للدار، قريب الثلاثة متاع العشية... بعد رحلة طويلة كنت خلالها ضيفا في مدينة دوز، حيث تمكنت من متابعة البعض من احداث مهرجان دوز... بش نكتب تدوينة على تحولي لدوز، لأنو كرم الضيافة و الحفاوة اللي لقيناها (و نأكد على صيغة الجمع) أكثر من انو العبد يمر عليها مرور الكرام

لأول مرة منذ ان تخرجت بش نعدّي ليلة راس العام في الدار... لآخر لحظة و أنا مازلت مش عارف روحي ش بش نعمل في الليلة هذي... لآخر لحظة مانيش عارف وين بش انعدّيها زادة... جرات العادة اننا نتلمّوا شوية أصحاب في دار واحد م الأحباب و نعدّوا السهرية مع بعضنا، و موش مع بعضنا، كل فول زاهي في نوّارو، و كل فول كيفاش مستانس و كيفاش يحب يعمل... المهم اننا تلقانا ملمومين مع بعضنا.

كانت المؤشرات الكل توحي اللي أنا بش انعدّي السهرية في الدار، لأنهم و لأول مرة من ثمانية سنين اتلمّوا الدار الكل مع بعضهم... و زيد ما اتصل حد م الجماعة يؤكد على وجوب الحضور... بصراحة كنت انا واحد م الجماعة اللي نحرص على الإتصال بالبقية و التذكير بالسهرية اللي يلزمها تجرى، لكنني ما اتصلت بحد لأنو ما عينتي في سهريات، و زيد لآخر لحظة ما كنتش عارف ظروفي و برنامجي

الحاصل، وصلت العشية للدار، نلقاهم جايبين دندون (ديك رومي)، و الصغار دايرين بيه عاملين عليه جو (مسكين الدندون)...

البرباش: (بنبرة تحمل بعض الدهشة و الإستغراب) فاش قام دندون ياخي؟

البرباش: (نسكت شوية) شنوة... بش نولّول نعملوا كيف الرّوامى!

الوالدة: (بنبرة تدل على أنها موش فاهمة حتى شي، و ماهيش ملوجة انها تفهم) و الله ما ندري عليهم...

الوالد: (مازال كيف وصل) اهلا برباش... جيت

البرباش: (بعد ما نسلّم عليه) مازلت كيف وصلت

الوالد: (يغزر للصغار كيفاش فرحانين بالدندون) آش ما يجي يفرحهم... علوش، دندون

البرباش: جيبلهم حتى دجاجة و إلا فلوس تو يعملوا عليه جو

الوالد: (يغزر في البورطابل متاعو) هيا هز بعدهم بالله خليني نذبحوا، مساكن رباو عليه الولف تو يعز بيهم

البرباش: (بكل لا مبالاة) آش من يعز بيهم بالله... هات، هات عليك

و اتكيت على هاك الدندون، ذبحتو... لا تلفتت للقبلة و لا سمّيت بسم الله و لا قعدت نستنى في الصغار انهم يستعدّوا للحظة المشؤومة اللي صديقهم الدندون بش يفارقهم فيها و هو لا حول و لا قوة له...

و وسط الدهشة متاع البعض م الصغار، و بكاء البعض، و هروب البعض الآخر، نتلفت للوالد، يتلفتلي، نجاوبوا بعضنا بإشارة مبهمة برؤوسنا... ملاّ ڤينية

الوالد: (يبتسم، بكل لا مبالاة) مساكن... خافوا من منظر الدم

البرباش: باهيلهم... ما تعرفش ع الظروف

الوالد: أي... والله، في هذي عندك الحق

و رغم كل شي، الدندون ما حبش يسلّم و يلعب دور الضحية المغلوب على امرو، ما ريناه كان كيف قام يجري وسط الزقاق... و اتقلبت التعاسة اللي في وجوه الاطفال إلى فرحة، و البكاء و العويل إلى صياح و تصفيق... لمجرد الأمل بأنو صديقهم الدندون يمكن يكون ما ماتش، مازال حي، مازال فيه النفس

مازال فيه النفس، الشي اللي خلاني نخلط عليه نجري و نعالجو بضربة نحشلو بيها راسو ضربة واحدة... رصاصة الرحمة

من غير ما نتكلّم حتى كلمة، و من دون ان يكون ليّ اي شعور في اللحظة هذيكة، فقط نتذكّر الإبتسامة متاع الوالد وقت ما تلفّتلي أسامة ولد اختي، و قاللي

أسامة: (بنبرة مخنوقة يحاول ينفّس بيها ع الغضب متاعو) ملاّ يهودي... خلّيتو رانا هزيناه للسبيطار يلصقولوا عنكوشو و يرجعوه حي بش نلعبوا بيه

ملا يهودي... أسامة ولد اختي عمرو ستة سنين، ما يتفرج في التلفزة كان كيف تظل فيها صور متحركة... و رغم ذلك ارتبطت في مخو صورة اليهودي بعدم الرحمة... او بش تكون العبارة اصح ارتبط انعدام الرحمة في مخيلتو باليهود.

اليهود، هوما بيدهم اللي قاعدين يجزروا في العباد في غزة...

و انا نذبح في الدندون، تذكرت هاك الخوماضة اللي حلوها هاك الجماعة القننوات، الفينو... كيفاش نذبحوا العلوش، و الطفل الصغير يشوف دم صديقو قدام عينيه...

كلو باهي، باهيلهم... هذاكة آش نجمت نقول بيني بين روحي و انا نحش في العنكوش متاع الدندون بدون ادنى شفقة او رحمة... أنو يشوف دم صديقو "العلوش"، يخليه نهار آخر يعرف شعور الشخص وقت اللي يشوف دم صديقو البشر، دم خوه، دم ولدو، قدامو، و هو واقف لا ذنب و لا حول له ولا قوة

مر كل ذلك في مخيلتي... مع ابتسامة دفينة في اعماقي، ابتسامة طغى عليها شعور باللامبالاة... اللي ما نجمتش نعرفلها حتى سبب

اتلمينا عند العشاء، الصغار يلعبوا و يضحكوا و يعيطوا ما على بالهمش... و الكبار واجمين، ساكتين، نسمعوا في حسن نصر الله درى فاش قاعد يقول ع المنار...

ساعات نبتسموا لما نشوفوه من تصرّفات الصغار ليس إلا...

لعبوا الصغيرات، اتفرهدوا، هبطوا لقشة م السماء... شربوا الڤازوز، كلاو الڤاطو... في عوض الخبزة، كانوا ثمة زوز، ثلاثة، على كل لون يا كريمة

تعبوا، رقدوا، هزّوهم لديارهم... العشرة و نصف، العباد الكل شدت بلاصتها... إن شاء الله كل عام و نحنا حيين بخير

إن شاء الله عام خير م اللي قبلو، و لو انو صعيب شوية... الڤينية اللي ريتها راس العام هذا ما سبقليش اني شفتها

انكلّم ناصر، نشوف إذا الجماعو ملمومين نخلط عليهم، يطلع هو بيدو ما في علمو بشي، لأنو راس العام اللي فات قعد في مشكلة مع مرتو، و كان وعدها انها بش تكون آخر مرة يعدّي ليلة راس العام بعيد علاها... وسام، قلب الدار اللي كنا نتلمّوا فيها لحانوت متاع خدمة، و ما نجمش يفرغها م السلعة المحطوطة فيها بش نتلموا فيها... مالك، مشى يخطب... و بقية الجماعة، كل حد اترمى في تركينة عدّى فيها سهريتو

انحل الجزيرة و نقعد نتفرج في الدمومات... و الخراب... هاو بش يتلمّوا و الأمور الكل بش تولّي في العنبر

عمناول قلت [إن شاء الله عام... خير م اللي قبلو]... عام السنا ما نلقى ما نقول كان إن شاء الله هذاكة حد الباس.


قريتها:
مشاركة هذه التدوينة:
E-Mail Facebook Twitter Blog Buzz