السبت، فبراير 23، 2008 01:40
الهداري الفارغة:

كيف ماهو صاير في البلوغسفير التونسية (و غير التونسية زاده)، خلطلي الطّش (البلل) و طڤّوني انا زاده، اللي طڤتني الاولى هي مريومة، و من بعدها زاده ثمة الأخوة سوسّو و المرمّاجي (و ثمة الشنفرة فقت بيه اللي هو طڤني أما مازال ما قالش) ...

قبل ما نبدى يلزمني نذكّر بقانون اللعبة: يلزمني نذكر ستة حاجات على روحي، اي حاجات، تنجم تكون اسرار، عادات، اللي هو... المفيد نقول أي حاجة و السلام (و ربي يلهينا في حوايجنا)... و من بعد نطڤي ستة مدونين اخرين و نمشي نقوللهم اللي انا طڤّيتهم عبر التعليق في آخر تدوينة ليهم... بخلاصة، قانون اللعبة هو الآتي:

1 – نذكر و نحط الروابط متاع المدونين اللي طڤّوني.

2 – نحط القانون متاع اللعبة في المدونة متاعي.

3 – نقول ستة حاجات على روحي، مهمة، مش مهمة... هذيكه اموري

4 – نطڤّي ستة مدونين اخرين

5 – المدونين هذوكه، نقوللهم اللي أنا طڤّيتهم، في المدونات متاعهم

باهي، بش نبدى... هاو الستة حاجات و إن شاء الله ما نطوّلش

أوّل حاجة:

عندي إدمان على حاجة اسمها قهوة (موش المحل، نحكي ع المشروب)... رغم اني ما نتكيّفش، لكنّي مستهلك كبير للقهوة... و زيد فيّ خاصية اني نشربها بزربة، يعني الكاس ما يلزموش يصبر اكثر من دقيقتين...

و رغم انها الحاجة هذي مقلقتني و تخليني في بعض الاحيان عرضة للإنتقادات م الأحباب و الاصحاب... و ديمات نعمل بالعاني و نعس على روحي بش نتمهل، لكنّي ما ننجمش نخلي الكاس متاع القهوة يصبر في يدّي...

ثاني حاجة:

ما نسمعش الموسيقى جملة... و ما نفهمش فيها، و ما نحبش نحكي ع الموسيقى و الفنانين و الجو هذاكه

حتى م الغنايات اللي محطوطين في البلوغ متاعي... ما نعرفش علاه حطيتهم، علاه هوما بالذات موش غنايات اخرين... يمكن من منطلق عندكشي عندي و اكهو

ملاحظة: العديد م الغنايات المحطوطين في البلوغ، انا بيدي مازلت لتو ما سمعتهمش...

ثالث حاجة:

نكره إسم فرحات... اي عبد يكون اسمو فرحات، نحاول انو ما تكونش ليّ اي خلطة بيه... حتى لو كان لقيت روحي مجبر بش نخالط شخص يحمل الإسم هذا لظروف عمل او لأي أسباب اخرى، فإني نحاول انو العلاقة ما بيناتنا تبقى محصورة في الإطار هذاكه

عندي زوز حوادث سابقة مع الإسم هذا... الاول كانت ظروف مادية و كان ليها اثر نفسي عكسي ظل ملازمني فترة طويلة... الثاني، اسباب ننجم نقول عاطفية و ما ننجمش نوضح اكثر من هكه... و كيف ما يقولوا الثالثة ثابتة، نخاف لا الشخصية الثالثة اللي تحمل اسم فرحات، واحد فينا يعمل عملة موش باهية في الآخر و ترصّيلنا في حل و اربط ( و آش بش يسلّكها وقتها)

رابع حاجة:

الماكلة كيف ما تكونش فيها بطاطا، ما ننجمش ناكلها...

خامس حاجة:

راسي صحيح برشا، كيف نشد في حاجة صحيح، يلزمها تتعمل مهما يكون... و كيف نعكس في حاجة، زايد الحديث.

عندي حاجات مثلا، م اللي عمري 11 عام حلفت عليهم (ما رميتش القسم، و لكنّي اتخذت فيهم قرار)... إلى يومنا هذا ما زلت ملتزم بالكلمة هذيكه

مثلا: ثمة عطار في الحومة، على حكاية تافهة و ما لهاش معنى، من عام 1989 إلى يومنا هذا، ما طبيتلوش الحانوت متاعو...

من غير ما نقعد نحكي و ندخل في التفاصيل، على خاطرني وعدت بش ما نطوّلش

سادس حاجة:

كلمتي نقولها و ما يهمنيش... و لو نكون نعرف انها الحكاية تنجم تضرني من بعد، لكني ما ننجمش نجامل مجاملة في غير محلها (و لو انو في بعض الاحيان، الواحد يلقى روحو مجبور بش ياخو العباد على قد عقولها، كيف ما يحبو... و كيف ما قالوا ناس بكري: الكذب في المصالح جايز)

و كيف ما قلت في الخامس حاجة، راسي صحيح برشا... يعني كيف نحصل نقول كلمتي، عمري ما نتراجع و نطلب السماح

الحاجة هذي، كانت ليها اثر كبير ياسر على مستقبلي الكل... و الحمدولله ( و وعدت اني ما نطوّلش... و إلا تو نكتبلكم جريدة)

اكهو... ثمة حاجات اخرى بالتأكيد، اما لو كان بش نقعد نحكي علاها معناها اني بش نطوّل... و زيد قالوا يلزم ستة حاجات اكهو.

الجماعة اللي بش نطڤّيهم:

1 – سنية: غرق و جنون فني

2 – فاطمة: أرابيكا (مسكرة المدونة متاعها حاليا)

3 – فريدكه: هذيان، دموع و ضحك

4 – وانتد: ملاّ فدّة (قاعد يحضّر، لكن ما فيها باس يوسّع بالو شويّة)

5 – كاكتوسا: زهرة الصبار

6 – الڤوفرنور: حاكم النورمال لاند (عندو مدة غايب)

قريتها:
مشاركة هذه التدوينة:
E-Mail Facebook Twitter Blog Buzz
تعليق Sonya ...  

خسا رة مطوّلتش الحكاية
على كلّ حال ربّى ابعّد عليك كل من اسمو فرحات

شكرا صديقي على خاطر تفكرتني
شكرا


:)


السبت, فبراير 23, 2008 2:02:00 ص

تعليق غير معرف ...
 

صحّة برباش


السبت, فبراير 23, 2008 2:24:00 ص

تعليق DJ WAEL ...  
أزال المؤلف هذا التعليق.

السبت, فبراير 23, 2008 8:19:00 ص

تعليق DJ WAEL ...  

والله لا فهمت .. ياخي لعبة و لاّ بلحق لحكاية ؟؟؟


السبت, فبراير 23, 2008 8:21:00 ص

تعليق ETC...ثم ...  

bonjour
برباش ، عندي مدة مدخلتش لل بلوقوسفار يعني تقريبا 24 ساعة
تنجمشي تفهمني حكاية "الطاق" و 6 حكايات الحاصيلو ماني فاهم شي

تشاو


السبت, فبراير 23, 2008 9:14:00 ص

تعليق البرباش ...  

@ سنية: ما طوّلتش على خاطر قالوا الحكاية ما يلزمهاش تطوّل... شكرا ع المرور

@ فرحات: لا سلام و لا حتى كلام، لا تدور بيّ لا ندور بيك...

@ المازوشي: لعبة خويا العزيز

@ عنصر: الحكاية وما فيها، هي انو واحد م المدونين (ربي يهديه) طلع بالطلعة هذي و قاللك كل واحد يحكي ستة حاجات على روحو (أي حاجة، المفيد ما يقعدش ساكت) و يزيد يختار ستة اخرين بش يعملوا نفس العملة


السبت, فبراير 23, 2008 1:28:00 م

تعليق الــبوهــــالـــي ...  

طقـّـيتك ... و انت ديجا مطقوق :))


الأحد, فبراير 24, 2008 11:23:00 ص

تعليق الــبوهــــالـــي ...  
أزال المؤلف هذا التعليق.

الأحد, فبراير 24, 2008 11:24:00 ص

تعليق DaliPotter ...  

لوووول، حتا أنا هو طقيتك تو تو، جيت باش نـخبرك ياخي نلقاك ماكل عل راسك ديـجا.

أيا ميسالش

jamais deux sans trois ^^


الأحد, فبراير 24, 2008 1:37:00 م

تعليق DaliPotter ...  

ou plutôt jamais 4 sans 5 LooL


الأحد, فبراير 24, 2008 2:11:00 م

تعليق Sosso ...  
أزال المؤلف هذا التعليق.

السبت, مارس 15, 2008 2:11:00 ص