الأحد، فبراير 10، 2008 23:45

برشا قراء... مدونين و غير مدونين، اصحاب و موش أصحاب (و إن شاء الله الكلنا احباب)... فيهم شكون يعرفني و يعرف اني انا هو البرباش اللي قاعد يكتب في البلوغ، و فيهم اللي يحكي ع المدونة متاع البرباش، بحضوري و من غير ما يعرف اني انا هو (ثمة اللي يشكر و اللي يذم... و اللي عاجبتو المدونة و اللي مش عاجبتو، ما عنديش حتى مشكل معاهم، بالعكس... الإختلاف في الرأي لا يفسد للود قضية، شنية هي القضيّة، و الله مانعرف، كلمة و تتقال و برّه) ... اتشكاو م الطول متاع التدوينات متاعي (سواء في التعليقات او في أحاديث جمعتني بيهم أو سمعتها)

المشكلة مش م التشكيات، يعني أنا قاعد نكتب، و اللي عينتو بش يقرى مرحبا، و اللي ما عينوش، ما عندي ما نعملو (مش بش نقعد نقرّق) الله غالب عليّ و عليه...

اللي يهمني، أنو برشا قالوا أنهم الحكايات يعجبوهم... لكن للأسف ما ينجموش يكملوهم للآخر على خاطرهم طوال برشا (ممالا ش نقول أنا اللي قاعد نكتب فيهم)...


لذا ... و ماخذة في الخاطر متاع الجماعة هاذم، و بش ما نحسش بروحي قاعد نكتب في الفارغ... بش نجرب (بش ما نقولش خذيت قرار، و تتحسب عليّ من بعد) اني نولي نقسم التدوينات على أجزاء ثماش ما تولّي مقبولة (و معقولة) من ناحية الطول متاعها

يعني بعض التدوينات، بش تولّي مقسمة على حلقات... كيف المسلسلات (وهذي حكاية انا متأكد انها بش تعجب العديد م القارئات... و ان شاء الله نكون عند حسن الظن)

...

حاجة اخرى، قاعد نبدل في المنظر (template) متاع المدونة... كان ثمة اي مشاكل راهو مني انا (ما عنديش برشا وقت المدة هذي، هذاكه علاش نتصور الحكاية بش تطول شوية)

...

في الأمان

قريتها:
مشاركة هذه التدوينة:
E-Mail Facebook Twitter Blog Buzz
تعليق DJ WAEL ...  

التدوينات طوال صحيح أما ما نتصوّرش إلّي حكاية التقسيم على أجزاء باش تكون باهية

و في الإخر الرأي رايك و التدوينات طيّارة كان مقسمين ولا مجموعين


الاثنين, فبراير 11, 2008 9:20:00 ص

تعليق غير معرف ...
 

Ya weldi el banna hya fi ettatwil mté3ik!! tu décris bien les shoses et j'aime bien ça! tu commence à faire des parties, au plutot feuilleton... mais pas comme les feuilletons mexicans stp!! bonne chance


الاثنين, فبراير 11, 2008 9:27:00 ص

تعليق Sonya ...  

فكرة ممتازة صديقي

انا برسونالمون انموت فى المسلسلات سيرتوا كيف يبدى فيها جانب من الرومانسية
...
مثلا التدوينة متاع "الكار و حبوك و ما عينيكش" ... كنت اتنجّم تتوسّع فيها ...تطلع مسلسل هبال يا جلال
ههههههه
أمّا بعيدا عن الفذلكة
أنا في العادة كيف يكون النصّ طويل برشا... نبخل بش نقراه بتمعّن...
أمّا لهنا في ارض التبربيش
ما انفيقش بطول النصّ بل بالعكس تلقاني نقرى و نتمنّي الحكاية ما توفاش

المحتوى و طريقة السرد و العرض (الافكار الصور و الاسطر) تجلب الانتباه و تستدعي
الى القراءة او بالاحرى الى التبربيش...


الاثنين, فبراير 11, 2008 1:33:00 م

تعليق غير معرف ...
 

تدويناتك إنتا طويلة؟ يا ولدي شنوا هالكلام, تبالله كان نبدا نتقرا و ندعي لربي التدوينة ماتوفاش من الجو و المتعة اللي فيها

برباش: بالله طول التدوينات نتاعك راني نتكلم بالمجد


الاثنين, فبراير 11, 2008 3:19:00 م

تعليق البرباش ...  

@ المازوشي: هاني نجرّب، و شكون يعرف

@ باج: يظهرلي فرد مرّة بش نبدّل أسامي العباد، نولّي نحكي على أنطونيو و أليخاندرو و راكال (هذاكه حد وين تبعت آخر مسلسل مكسيكي، ما نعرفش شنوة الأسامي الدارجة تو)

@ سنية: هاو العباد اللي تقيم المورال، شكرا صديقتي

@ ولد الصحرا: حتى أنا يظهرلي بش نرجع لجوّي القديم ياخويا... أما تو حصلت بديت و بش نكمل الحكاية هذي هكه، و من بعد يعمل الله دليل.


الأربعاء, فبراير 13, 2008 10:47:00 ص