الأربعاء، يناير 09، 2008 18:00
الهداري الفارغة: , , ,

ماهيش حكاية المرّة هذي... حبيت فقط نقول مبروك علينا العام الهجري الجديد... كثرت التباريك و الأعياد هــ المدّة و ما مدبرينها في الحكاية كان جماعة التيليكوم و التونيزيانا، صحّه عليهم

شوية تغييرات و شوية أخبار حبيت نحكي عليهم في التدوينة هذي...

أوّل حاجة: تغييرات جوهريّة

شويّة تبديل في المنظر متاع البلوڨ، خاصة البانر اللي الفوق، كانت ثمة تصويرة متاع واحد هايم على فلوكة في البحر في الظلام، الله أعلم بيه يصطاد و إلاّ بش يحرق

تو ثمّة تصويرة متاع نمّالة تبربش في التراب...

الحكاية و ما فيها، قالولي بدّلها التصويرة... و بما انّي نسمع الكلام... بدّلتها

ثاني حاجة: شويّة... فن و موزيكا

التركينة متاع الموزيكا اللي ع اليمين، ما عادش فيها الأغاني متاع ناتاشا أطلس، تو فيها الأغاني متاع مطربة أخرى اسمها لينا شماميان

فنانة سورية أصلها من أرمينيا (ثمة غناية ... تغنّي فيها باللغة الأرمينبية)، تغنّي م اللي عمرها خمسة سنين... عندها شهادة جامعية من كلية الإقتصاد تحصلت عليها عام 2002، و على ما يبدو فاقت اللي الشهادة متاعها ما توكّلش خبز... فانتسبت لمعهد الموسيقى.

عندها صوت ملائكي تحفون برشا، و أسلوبها في الغناء يذكّر بحكايات ألف ليلة و ليلة

ما عندها كان زوز ألبومات: هـالأسمر اللون (2006) و شامات (2007)، تلقوا الأغاني متاعها الكل في ركن [شوية... فن و موزيكا] اللي ع اليمين

بالنسبة لأغاني ناتاشا أطلس، اللي كانوا محطوطين في التركينة... اللي يحب يستحفظ بيهم (قبل ما ننحّيهم) ينجم ينزل على اسم الغنّاية و يسجّلها


ثالث حاجة: سلّكوها... جماعة الأرياف

كمالة الحكاية، الكمبيوتر تم إصلاحو (ما نعرفش عليهم كيفاش دبروا روسهم، يقعد الخير ديما موجود في الدنيا) و الوليدات تو مصلّي ع النبي عاملين جو و مستمتعين بالشي اللي قاعدين يتعلموا فيه

ربّي يعطيهم الوقت الطّـيّب.

إيناس (اللي ما يعرفهاش، ينحّم يقرى تدوينة [مساكين... جماعة الأرياف]) نهار الإثنين اللي فات قالتلي ع الحكاية، و جابتلي شهادة شكر م المدرسة (حتى هي عطوها شهادة زادة، نفس الشهادة متاعي مبدلين فيها الإسم أكهو... و المؤسسة متاع بوها بالطبيعة بعثولها شهادة سمحة، شروها م المكتبة)، الطريف في الأمر أنّو الشهايد متاعي و متاع إيناس هوما عبارة على ورقة بيضة، عادية، على ما يبدو كتبوها ع الكمبيوتر متاع المدرسة و فيها طابع و تصحاحة (الإمضاء) و النص متاع رسالة الشكر، باللغة العربية، فيه أربعة أخطاء لغوية (متاع همزة و إلا ت غالطة، من غير ما نحكي ع التعبير في حد ذاتو...)، اللي حتّى من إيناس جابتلهم خبرة كيف المعلمة صاحبتها جابتلها الشهايد، و اللي كيف سألتها عليهم، قالتلها اللي هوما نهارين بش نجموا يكتبوا هاك الكليمتين... على كل، خبر من بلاش و يرحم والديهم اللي ع الأقل تفكروني.

رابع حاجة: الكتافات، و حكاية المعلمة اللي بلاش باك

امام تشكّيات البعض م الأولياء متاع التلامذة... و بعد العودة م العطلة متاع الشتاء، تفاجأ الأولياء متاع التلامذة اللي يدرسوا في احد الأقسام متاع السنة الثانية، انها المعلمة المذكورة سابقا في تدوينة [الكتافات... و ما تعمل] و زادة في تدوينة [الكتافات... و ما قالت الناس] هي اللي بش تقرّيلهم وليداتهم... ردّة الفعل متاعهم كانت سريعة و العديد منهم دخل للقسم و قام بإخراج الطفل متاعو قدّام مها اللي لقات روحها تقرّي في قسم محسوب فارغ (كعبتين و كعبة، و الأولياء أصرّوا على عدم إرسال أبناءهم للمدرسة)... إدارة المدرسة، قررت أنها ترجّعها للقسم اللي كانت تقرّي فيه (ما يسالش، تلامذة السنة الخامسة، الأولياء متاعهم متفهمين و ما يحبّوش يعملوا المشاكل برشا، لا يرد فاس على هراوة)...

يبقى الحال على ما هو عليه، و على المتضرّر و اللي مش عاجبو أنو يختار حيط م الحيوط اللي قدّامو (و الإقتراح هذا تقدمت بيه المعلمة بيدها سابقا)، و يكسّر راسو عليه

خامس حاجة: حتّى شي...

حبيت نقول خمسة و خميس و برّه



قريتها:
مشاركة هذه التدوينة:
E-Mail Facebook Twitter Blog Buzz
تعليق DJ WAEL ...  

يا خويا إن شاء الله بالبركة هالتغييرات

و عجبتني عفسة المعلمة

ربي يسهلك التقدم سي البرباش


الأربعاء, يناير 09, 2008 6:42:00 م

تعليق Mariouma ...  

saha saha ya barbech inchala dima 7arekk ou andek mat9ol


الأربعاء, يناير 09, 2008 7:07:00 م

تعليق FREE-RACE ...  

البانر الجديد متع النمـّـالة مـُــعبـّـر برشا... و يدل على أن البرباش ما يفلّتش التفاصيل التي كثيرا ما تُـــــحدث الفارق.
يا خويا نشاء الله ديما "متنعوشين" برياح التجديد :)


الأربعاء, يناير 09, 2008 7:48:00 م

تعليق غير معرف ...
 

ya3tik esse77a ya berbech.inchallah dima el9oddem .mouch el teli


الأربعاء, يناير 09, 2008 8:17:00 م

تعليق غير معرف ...
 

تدوينة هايلة برشة, تقولش عيها صفحة في مجلة أوروبية

إنتا فنان موهوب و يعطيك الصحة يا خويا


ولد الصحرا


الأربعاء, يناير 09, 2008 8:24:00 م

تعليق Wanted ...  

أنا نقترح عليك باش تعمل فورماسيون لأساتذة الأنفورماتيك إلّي يقرّيو فينا و تورّيهم شويّا عفسات متاع تبربيش و ديزاينز)


الأربعاء, يناير 09, 2008 9:35:00 م

تعليق Gouverneur de Normalland ...  

مدونتك يا برباش تعمل الكيف شكلا و مضمونا .


الخميس, يناير 10, 2008 1:10:00 ص

تعليق غير معرف ...
 

برافو برباش , ما عندي مانقول ...

لا عندي مانقول , أول مرة نكتشف إللي إنت شايب !!
30 سنة تتسمى شايب عندي أنا ...
فرحتك خويا برباش وربي يخليلنا هالبلوg ...


الخميس, يناير 10, 2008 5:44:00 ص

تعليق البرباش ...  

مشكورين على مروركم و تعليقاتكم... إن شاء الله عامكم مبروك... و إن شاء الله يسمع منكم ربّي (الجماعة الكل)


الجمعة, يناير 11, 2008 5:04:00 ص

تعليق غير معرف ...
 

yessssssssssssssssssssssssssssssss mafhimt chay


السبت, أبريل 04, 2009 3:56:00 م